Shkodër - Biznesi turk shpreh interes për investime në sektorin e ndërtimit

Në delegacion i biznesit turk gjatë një vizite zyrtare dje në Shkodër, ka ofruar bashkëpunim për Bashkinë e Shkodrës në fushën e ndërtimeve. Një delegacion zyrtar i  Sekretariatit të  Tregtisë së Jashtme Turke, kryesuar nga  Ulker Guzet, zv/sekretare e tij nën shoqërimin e një delegacioni me përfaqësues të firmave të mëdha turke nga fusha të ndryshme, vizitoi qytetin e Shkodrës, pas nënshkrimit të marrëveshjes për Tregtinë e Lirë në Malin e Zi. Gjatë një takimi me kryetarin e Bashkisë, Lorenc Luka, pjesëtarët e delegacionit turk u njohën me aktivitetet ekonomike në qytetin më të madh verior. Kryebashkiaku Luka i njohu me situatën e investimeve dhe në veçanti, me ato të huaja në Shkodër, krijimin e kushteve për investitorët e huaj, etj. Zv/sekretarja e Sekretariatit të Tregtisë së Jashtme Turke, Ulker Guzet, shprehu besimin për bashkëpunim me biznesin shkodran, si dhe gatishmërinë për të kontribuar në fushën e ndërtimeve. Sipas saj, angazhimi i biznesit turk do të jetë maksimal si për të mbështetur projektet që do të hartojë Bashkia, ashtu dhe duke dhënë një garanci, besueshmëri, cilësi dhe korrektesë në marrëdhëniet dypalëshe.