Shpallja “Non Grata” e Ikballe Hudutit, ministri Lamallari reagon ndaj “ekstremizmit dhe nxitjes së urrejtjes”
Ministri i Punëve të Brendshme Besfort Lamallari, ka artikuluar një qëndrim të prerë institucional lidhur me vendimin për shpalljen “person i padëshirueshëm” (non grata) të shtetases nga Kosova, Ikballe Huduti. Ky reagim erdhi pas debateve të ngritura mbi aktivizimin e saj në protestat e zhvilluara në Tiranë dhe profilizimin e saj publik si mbështetëse e ish-Liderit Suprem të Iranit, Ali Khamenei.
Përmes një deklarate zyrtare të shpërndarë në rrjetet sociale, ministri Lamallari ka hedhur poshtë pretendimet se masa administrative e dëbimit lidhet me cenimin e të drejtës së protestës, duke specifikuar se bëhet fjalë për një ndërhyrje ligjore kundër radikalizmit dhe rreziqeve të sigurisë kombëtare.
Autoritetet e sigurisë në Shqipëri e kanë cilësuar profilin e Hudutit si të papajtueshëm me standardet e një vendi anëtar të NATO-s. Sqarimi i ministrit të Brendshëm u fokusua në ndarjen e qartë midis tubimeve legjitime qytetare dhe propagandës së sponsorizuar nga jashtë.
“Mos merremi me protestuesit?! Jo! Jo vetëm nuk merremi me asnjë protestues si i tillë, por përpiqemi t’i dëgjojmë të gjithë ata që janë sinqerisht të shqetësuar. Por patjetër që do të merremi me çdo urrejtje nxitës dhe ekstremist, si kjo zonja që bindjet e saja mund t’i mbajë për vete jashtë Shqipërisë të paktën 15 vitet e ardhshme!”, shkruan ministri Lamallari në rrjetet sociale.
Sipas tij, vendimi për ndalimin e hyrjes së saj në territorin shqiptar për një periudhë 15-vjeçare bazohet në parandalimin e ideologjive radikale, të cilat ministri i cilëson si “obskurantizëm dhe ekstremizëm”.
Një element tjetër i kritikuar ashpër në reagimin e ministrit ishte gjuha e përdorur nga e dëbuara në një material të saj vizual, ku krahas vlerësimeve në superlative për Ajatollahun e Iranit, përfshihej edhe figura e kryeministrit të Kosovës, Albin Kurti.
Përfaqësuesi i ekzekutivit shqiptar e cilësoi këtë paralele të ndërtuar në diskursin e Hudutit si një tentativë të papranueshme për të deformuar pozicionimin politik të liderëve legjitimë të rajonit.
“Një turp më vete edhe përzierja e emrit të kryeministrit të nderuar të Kosovës në përroin psiqik të kësaj zëdhënëseje të një shteti të shpallur me konsensus shtet terrorist nga Kuvendi i Shqipërisë.”, nënvizon Lamallari, Ministër i Punëve të Brendshme
Në përfundim, qëndrimi institucional i tij rikonfirmon se linja politike e Shqipërisë mbetet e palëkundur në zbatimin e rezolutave parlamentare, të cilat e përcaktojnë regjimin aktual të Teheranit si një strukturë që financon dhe mbështet aktivitetet terroriste në rrafshin ndërkombëtar, duke mos lejuar përhapjen e agjendave të tij brenda kufijve kombëtarë të Shqipërisë.
/rtsh.al/