Shqipëria kundër çdo plani që nxit ndarjen e Kosovës

Tiranë (Start) - Një tjetër deklaratë nga një zyrtarë i lartë shtetëror në Shqipëri ka ardhur në mbrojtje të pavarësisë së Kosovës dhe kundër ndarjes së saj. Kësaj herë, ka qenë Kryetarja e Kuvendit Jozefina Topalli e cila është shprehur kundër çdo ndarjeje territorial të Kosovës dhe kundër çdo plani që synon atë. Gjatë takimit që zonja Topalli zhvilloi me homologun e saj nga Bosnjë Hercegovina, Niko Lozançiç, ajo tha se “Shmangia e çdo vakumi pushteti, sqarimi i raporteve UNMIK - EULEX -NATO (KFOR), duke përjashtuar kategorikisht mundësinë për "ndarjen gjeografike" të shtrirjes së tyre, shmangia e çdo ndarje institucionale mbi baza etnike janë disa nga hapat vendimtare që do të parandalonin përshkallëzimin e situatës, veçanërisht, në komunat me shumicë serbe në Kosovë”.

Sipas kryetares së ligjvënësit shqiptar, "Shqipëria është e bindur se paraqitja e planeve për ndarje mbi baza etnike, angazhimi për ndërtimin e një shteti paralel, që cënojnë tërësinë territoriale të shtetit të pavarur të Kosovës, përbëjnë rrezik serioz për paqen, sigurinë dhe stabilitetin, jo vetëm në Kosovë, por në tërë rajonin tonë"