Shqipëria, më e padisiplinuara

Kombëtarja shqiptare pati fushatë dështuese në kualifikimet për kampionatin evropian ‘Euro 2012’. Por, jo vetëm kaq. Kuqezinjtë janë shquar edhe për një aspekt negativ, atë të ekipit më të padisiplinuar në eliminatoret për kompeticionin, i cili do të mbahet vitin tjetër në Ukrainë dhe Poloni.

Futbollistët e Shqipërisë janë ndëshkuar me kartonë të kuq katër herë, ndërsa me të verdhë 25 herë. Kjo i bën ata më të padisiplinuarit të kualifikimeve. Armend Dallku, Erjon Bogdani, Ansi Agolli dhe Andi Lila ishin lojtarët e skuqur, ndërsa të zverdhur pati plot.

Ndërsa, ekipi më agresiv i eliminatoreve të kontinentit të vjetër ishte Letonia, lojtarët e së cilës shkaktuan 16,7 faulle për ndeshje. Ndër statistikat tjera, veçohet Holanda, si ekipi më i efektshëm, duke realizuar 37 gola, kurse San Marino pranoi më së shumti, 53 sosh.

Spanja pati më së shumti gjuajtje në portë, kurse Kroacia mban rekordin e goditjeve nga këndi. Sulmuesi i Holandës, Klaas-Jan Huntelaar, shënoi më së shumti gola, 12, ndërsa gjermani Mesut Ozil ishte mbret i asistimeve.