Shtyhet më 24 korrik seanca gjyqësore për presidentin e Besës, Bizhdili

TIRANE - Të mërkurën ka qenë seanca e parë gjyqësore ndaj presidentit të Besës, Nexhat Bizhdili, i cili akuzohet nga Prokuroria për trukim ndeshjesh. Në fakt kjo seancë nuk është konsumuar, por është shtyrë, pasi mungonte avokati i palës së akuzuar, Ardian Visha. I pranishëm ishte vetë kreu i klubit kavajas, i cili kërkoi kohë për t’u njohur me materialet, ndërsa ripërsëriti habinë e tij për fajet që i atribuohen falë përgjimeve të zbardhura nga organi i akuzës. Drejtuesi i seancës, gjyqtari Hoxha, e pranoi kërkesën e Bizhdilit, por e paralajmëroi se duhet të jetë i përgatitur për seancën e radhës, e caktuar për datën 24 korrik, pasi nuk mund të ketë tjetër shtyrje. Vetë Bizhdili e pranon pa pikë problemi se ka folur në telefon me arbitrat, por thekson se nuk ka korruptuar askënd, duke thënë se thjesht u ka kërkuar që të ishin korrektë me gjykimin e tyre në ndeshjet e Besës. Nisur nga kjo pohon se, nëse do t’u kishte kërkuar favore me parà në dorë, atëherë skuadra e tij do t’i kishte fituar takimet në Fier dhe Berat. Sipas Bizhdilit, telefonatat me arbitrat nuk janë asgjë përkundrejt drekave dhe darkave të homologëve të tij me këta të fundit. Sakaq, i njohur si një kritik i hapur i federatës, ai nuk nguron të thumbojë edhe presidentin e FSHF-së, Armand Duka. Po ashtu akuzon edhe politikën, e cila sipas tij, po ndërhyn në punët e brendshme të klubit që drejton prej më shumë se një dekade.
Akuza, çfarë rrezikon Besa dhe Bizhdili
Nëse gjendet fajtor, presidenti i KS Besa, Nexhat Bizhdili, rrezikon një dënim nga gjobë deri në burgim. Referuar nenit 197/ a, “Paracaktimi i rezultateve në garat sportive”, të Kodit Penal, në bazë të të cilit është ngritur edhe akuza e Prokurorisë ndaj Bizhdilit, atëherë ky i fundit rrezikon shumë. Por, peripecitë për KS Besa nuk mbarojnë me kaq. Nëse presidenti i këtij klubi do të gjendet fajtor, atëherë menjëherë klubi do dënohet sipas Kodit të Drejtësisë Sportive të Federatës Shqiptare të Futbollit. Në nenin 68 të këtij të fundit thuhet qartësisht se klubi rrezikon deri në zbritjen një kategori më poshtë. 

(er.nu/panoramasport/BalkanWeb)