Sigurinë e plazheve e promovon Ministria e Mbrojtjes

Zona nënujore e bregdetit të rrethit të Vlorës do të pastrohet nga predhat dhe municionet e mbetura nga periudha e Luftës së Dytë Botërore apo dekadave të mëvonshme, në kuadër të operacionit ‘Plazhe të sigurta’. Në kuadër të nisjes së fazës së parë të këtij operacioni, Ministri i Mbrojtjes, Gazmend Oketa, zhvilloi të shtunën një vizitë në Komandën e Distriktit të Dytë Detar në Vlorë, gjatë të cilit theksoi se “ky operacion synon ti kthejë plazhet e Vlorës në mjedise të sigurta”. “Në fazën e parë të këtij projekti do të pastrohet zona e Ujit të Ftohtë, ku, janë evidentuar 30-40 tonë predha dhe municione, që kanë mbetur nga periudha e Luftës së Dytë Botërore. Pastrimi i kësaj zone që ndodhet pranë Kalasë, do të realizohet brenda muajit maj. Operacioni parashikon nxjerrjen nga uji të predhave dhe municioneve, transportimin e tyre në drejtim të Gadishullit të Karaburunit, në një distancë rreth 12 km, në vendin e quajtur Shën Vasil, ku do të kryhet edhe shpërthimi i tyre, në kushtet e një sigurie të plotë, në bunkerë”, tha Oketa. Sipas tij, gjithçka do të kryhet brenda standardeve të sigurisë dhe i gjithë gjiri i Vlorës do të pastrohet, ndërsa më pas do të vazhdojë puna edhe në zona të tjera të vendit. Ndërkohë që nënvizoi se është hartuar dhe një strategji e detajuar përmes së cilës synohet që deri në vitin 2010, të demontohen të gjitha municionet e rrezikshme. Kryetari i bashkisë së Vlorës, Shpëtim Gjika, vlerësoi përpjekjet e ministrit Oketa për të realizuar pastrimin e zonës nënujore të bregdetit të Vlorës, që përbën një shqetësim të ngritur edhe nga qeverisja vendore. Ai garantoi mbështetjen e bashkisë në këtë operacion, ndërkohë që falënderoi edhe forcat e ushtrisë që do ta realizojnë atë. Komandanti i Brigadës Detare, Kapiten i Rangut të Parë, Kristaq Gerveni, e njohu minstrin Oketa dhe të pranishmit me strategjinë dhe detajet e operacionit “Plazhe të Sigurta”. Në operacion do të përfshihen dy grupe polumbare, mjetet dhe personeli i Flotiljeve Detare, Shërbimi Hidrografik, Batalioni i Mbështetjes Logjistike, Policia Ushtarake e Vlorës, Njësia e Municioneve dhe Eksploziveve, si dhe mjete të Grupit të 28-të Naval Italian. Gjithçka do të drejtohet nga një strukturë e veçantë në formën e Task Grup. Sipas specialistëve, parashikohet që çdo ditë të nxirren nga një thellësi prej 7 metrash dhe njëkohësisht të asgjësohen 1.5 -2 tonë municione. Aktualisht në gjirin e Vlorës janë evidentuar 11 pika të infektuara, mes të cilave ajo e zonës së “Kalasë” në bregdetin e Ujit të Ftohtë, ku aktualisht gjenden 30-40 tonë predha dhe municione të mbetura nga Lufta e Dytë Botërore, por edhe nga viti 1997 dhe 1998. Veç kësaj, në hartën e përcaktuar përfshihen edhe zona e Triportit, Raguza e Shën Janit (Karaburun). Ekspertët shqiptarë që do të përfshihen në operacionin ‘Plazhe të sigurta’ e konsiderojnë atë të vështirë, për shkak se do të punohet nën ujë dhe me lloje municionesh, që shpesh kanë shkallë të ndjeshme rrezikshmërie. Po dje, ministri i Mbrojtjes, Gazmend Oketa, vizitoi dhe Bazën Detare të Pashalimanit, ku u njoh me punën për zbatimin e projektit të ndërtimit të 4 anijeve të mëdha patrulluese. Ky projekt synon pajisjen e Brigadës Detare me 4 anije të mëdha patrulluese “STAN PATROL BOAT”, si dhe ndërtimin e një kantieri detar për anijet. Projekti ka një vlerë prej 31 milionë eurosh, 11 milionë prej të cilave janë kontribut i qeverisë holandeze. Anija e parë është në përfundim të ndërtimit në Holandë dhe do të dorëzohet gjatë muajit gusht, ndërkohë që tre të tjera do të mundësohen në kantierin detar të Pashalimanit.