Siria pranon rrëzimin e avionit turk

Avioni është trajtuar në përputhje me ligjet që përcaktojnë situata të tilla, citohet një zëdhënës ushtarak, bën të ditur agjencia e lajmeve Sana.

Zëdhënësi tregoi se avioni ishte goditur nga artileria kundërajrore duke e rrëzuar mjetin në det.

“Më vonë kuptuam që ishte një avion i ushtrisë turke që kishte hyrë në hapësirë tonë ajrore”. shtoi ai.

Ndërkohë autoritetet turke më parë besonin se një prej avionëve F-4 luftarakë të saj ishte qëlluar nga forcat siriane.

Ushtria turke njoftoi se kishte humbur kontaktin me një avion luftarak, i cili po fluturonte në afërsi të kufirit detar me Sirinë.

Marrëdhëniet mes Turqisë dhe Sirisë, dikur aleate të ngushta, janë prishur që pas nisjes së trazirave kundër presidentit Bashar al-Assad në mars të vitit 2011. Turqia është ndër vendet e para që ka kërkuar largimin e presidentit sirian nga pushteti, ndërkohë që në lindje të vendit, pranë kufirit me Sirinë janë strehuar mbi 30 mijë sirianë të zhvendosur të konfliktit që tashmë është në përmasat e një lufte civile, raportojnë mediat.