Situata emergjence në Qarkun Shkodër, bllokohen nga dëbora shumë fshatra
Shkodër, 3 janar 13:04 NOA – Situatë emergjence paraqitet orët e fundit në qarkun e Shkodrës, informon korrespondenti i agjencisë s lajmeve NOA.
Në rrethin Malësi e Madhe, akset rrugore Gropat e Selcës – Vermosh dhe Bogë – Theth janë te bllokuar nga dëbora që ka kaluar të 40 centimetrat lartësi.
Ndërkohë, burime zyrtare nga policia e Shkodrës, bënë të ditur për agjencinë NOA se në rrethin Puke rrugët janë të kalueshme me zinxhirë ndërsa vazhdon të bjerë dëborë me intestitet.
“Aktualisht në qytetin e Pukës, trashësia e dëborës është rreth 15 centimetra, ndërsa në Iballe rruga është e bllokuar”, - saktësoi për agjencinë e lajmeve NOA, drejtoria e Policisë së Shkodrës.
Sakaq, në aksin rrugor Fushë Arrëz-Qafë Mali, Qafë Shllak, Kukës, dëbora ka arritur në trashesine rreth 50 centimetra.
Në këto akse lëvizet me vështirësi për mjetet e vogla ndërsa për mjetet e mëdha është pothuajse i pamundur qarkullimi.
Kurse në aksin rrugor Qafë Mali – Fierzë, dëbora ka mbërritur në trashësinë rreth 40 cm, rruga është e kalueshme, por vende-vende ka akull.
Burime nga shtabi i Emergjencës së Prefekturës Shkodër, sakaq konfirmuan se në fshatrat Hadroj, Gjegjan, dëbora ka arritur momentalisht në trashësi rreth 15 cm.
Drejtoria e Policise Qarku Shkodër thotë se në të gjitha akset problematike po punohet për pastrimin e dëborës, por pranon se kushtet atmosferike po e vështirësojnë së tepërmi punën.
Këshilla më e ngutshme për përdoruesit e rrugëve në këto momente është që drejtuesit e automjeteve të marrin masa, për pajisje me zinxhirë, për shkak të terrenit të rënduar nga reshjet e dëborës.
r.d/NOA