Spanjë, 12 klube të zhytura në borxhe

Pas krizës ekonomike që goditi rëndë Premiershipin anglez, duket se tashmë është radha e La Ligas spanjolle: arsyeja e vërtetë pas kërcënimit të Shoqatës së Futbollistëve (AFE) për grevë në ndeshjet e 11 prillit (kur është parashikuar të zhvillohej supersfida Real-Barcelona), është se plot 12 klube janë gati të plotësojnë aplikimin “Ley Concursal”, pra të kryejnë praktikat për faliment. Situata ekonomike është e frikshme: vetëm 15 për qind e klubeve janë të rregullt me pagesat e lojtarëve, ndërsa borxhet e Ligas dhe Segunda Division (Kategoria Dytë) kapin shifrën e afro 3300 milionë eurove. Pritet një marrëveshje ndërmjet Ligës dhe Federatës Iberike, që do t’i detyrojë klubet të paguajnë rrogat, në të kundërt greva duket e pashmangshme.

Klubet që ndodhen më shumë në vështirësi janë Kserez dhe Majorka: plotësimi i “Ley Concursal” duket praktikisht i paevitueshëm. Ndërkohë, në Spanjë ka edhe debat për shpërndarjen e fondeve nga e drejta televizive. 13 klube të ligave më të ulëta kanë kërcënuar se do të heqin dorë nga e drejta TV, nëse klubet e mëdha nuk pranojnë negocimin e përbashkët. Ndër të tjera, nuk mund të realizohet as projekti që klubet e futbollit të paguajnë vetëm gjysmat e borxheve: në fakt, Liga e Futbollit ka bërë të ditur se nuk mund të garantojë asnjë mbështetje financiare.