“Stardust”, të dashurosh një yll” në Millenium II

Këtë verë do të bjerë një yll dhe aventurat do të fillojnë. Pas “Busullës së Artë”, është koha për të parë në ekranin e kinemasë Millennium II në kryeqytet një histori dashurie e aventurash që përzien të gjithë temat e mëdha dhe elementet fantastike, me një nuancë të fortë romantizmi. Nga imagjinata e autorit të bestsellerit Neil Gaiman dhe nga regjisori Mathew Vaughn mbërrin në ekranin e madh “Stardust”, historia e një ylli që bie dhe zbret në një mbretëri të magjepsur. Në pamje të parë duket një meteor i zakonshëm, por në fakt, është një grua e bukur që e ndjekin të gjithë për fuqitë e saj sekrete. Nga shtrigat e këqija te princeshat e fiksuara, nga dëshira e pushtetit, te piratët fluturues dhe monstrat luftarake, të gjithë ata që takojnë yllin kanë projektet e tyre personale dhe një dëshirë të vetme; të bëjnë për vete zemrën e saj. Rezultati është tronditës, një histori dashurie e aventurash që përzien të gjithë temat e mëdha dhe elementet fantastike, të cilat gjithmonë i kanë bërë njerëzit e të gjitha moshave që të adhurojnë përrallat. Kjo histori fillon të projektohet që nga e mërkura në kinema Millennium II në Tiranë.

Skeda e filmit

Titulli: “Stardust”
Regjia: Mathew Vaughn
Skenari: Jane Goldman dhe Mathew Vaughn
Përshtatur: Nga romani me të njëjtin titull i Neil Gaiman
Narrator: Ian McKellen
Aktorë: Charlie Cox, Claire Dance, Robert De Niro, Michelle Pfeiffer, Ricky Gervais, Mark Strong, Peter O’Toole, Sienna Miller, Rupert Everett, Nathaniel Parker
Kohëzgjatja: 128 minuta
Gjinia: Aventurë, fantazi, romancë
Muzika: Itan Eshkeri
Sinopsi: Ngjarjet zhvillohen në vitet 1800, kur Tristan Thorn kalon kufirin e botës së tij për të shkuar në një univers paralel magjik, sepse i kishte premtuar një yll që bie, të dashurës së tij, (Victoria) e cila nuk e dashuron aspak djaloshin. Aventurat dhe fantazia e shoqërojnë udhëtimin e çuditshëm të adoleshentit, i cili zbulon se pas një ylli fshihet një vajzë e brishtë, por me karakter të fortë.

18 Qershor 2008