Swoboda: Moszgjidhja e krizës bllokon liberalizimin e vizave
Pas letrës së përbashkët të 19 majit të krerëve të dy grupimeve kryesore politike në Parlamentin Europian, drejtuar Kryeministrit dhe liderit të opozitës në Shqipëri, në të cilën kërcënohej hapur me ndërprerje të procesit të anëtarësimit për sa kohë nuk zgjidhej kriza politike në vend, një tjetër kërcënim vjen nga Hannes Swoboda, i pranishëm në darkën e Strasburgut. “Ne nuk do të ndalojmë iniciativën tonë derisa të kemi një zgjidhje dhe Shqipëria duhet ta dijë se pa zgjidhje, zhvillimi i marrëdhënieve me BE-në do të ketë shumë, shumë probleme, duke përfshirë këtu dhe çështjen e liberalizimit të vizave. Nuk është qëllimi ynë të kërcënojmë, por të tregojmë rrugën për liberalizimin e vizave dhe negociatave për anëtarësim dhe për këtë ne presim që Shqipëria të japë po ashtu kontribut”, ka deklaruar Swoboda, zv/president i APSDE në PE.
Pyetjes së TCH, në ç’mënyrë do ta bllokoni liberalizimin e vizave dhe a do ndërhyni dhe te vendet anëtare, zyrtari europian është përgjigjur: “Ne duhet të vendosim për liberalizimin e vizave. Pa Parlamentin Europian, liberalizimi i vizave nuk bëhet”.
Ky kërcënim vjen pikërisht në kohën kur rekomandimi i komisionit për liberalizimin e vizave me Shqipërinë dhe Bosnjën pritet t'i kalojë për shqyrtim Parlamentit Europian dhe rikthen debatin për rrezikun e heqjes së regjimit të vizave vetëm për Bosnjën.
TCH kontaktoi edhe me pjesëmarrësit e Partive Popullore Europiane në darkën e Strasburgut, pa mundur të marrë reagimet e tyre, pasi Joseph Daul ishte i zënë me një drekë pune me presidentin e Eurozonës Jean-Claude Junker, pas të cilës u largua nga Brukseli.
Ndërsa Eduard Kukan ndodhej në Sllovaki, ku do të qëndrojë deri të hënën e ardhshme, e po kështu dhe Iannis Kasoulides, që do të qëndrojë në Qipro deri në fund të javës.
#