TEL AVIV – Izraeli kërkon reagim pas shfaqjes së flamurit të tij me svastikë në parlamentin polak

VARSHAVË, 22 prill /ATSH-DPA/ – Izraeli i ka bërë thirrje qeverisë polake të marrë masa ndaj një deputeti të ekstremit të djathtë, i cili shpalosi një flamur izraelit me një svastikë në parlamentin polak, por duke shkaktuar edhe reagime të ashpra nga Varshava.

”Deputeti polak, Konrad Berkowicz ka një histori të dyshimtë që përfshin mbështetje publike për nazizmin. Historia ka treguar se ku çojnë racizmi dhe antisemitizmi, siç e di shumë mirë Polonia”, shkroi Ministria e Jashtme e Izraelit në X.

”Një person i tillë nuk ka vend në parlamentin e një Polonie demokratike. Presim që autoritetet polake të veprojnë në mënyrë vendimtare dhe të shpejtë”, thuhej në postimin e së martës.

Një zëdhënës i Ministrisë së Jashtme të Poland reagoi të mërkurën në X duke thënë se  ”janë polakët ata që zgjedhin deputetët e tyre, jo ambasadat e huaja”.

Ai shtoi se kryetari i parlamentit ka vendosur tashmë një gjobë ndaj Berkowicz dhe i ka ulur kompensimin parlamentar.

Sipas zëdhënësit, edhe Prokuroria Publike ka nisur hetime.

Javën e kaluar, Berkowicz shfaqi në parlament një flamur të improvizuar izraelit, ku në vend të Yllit të Davidit ishte vendosur një svastikë blu.

Ai akuzoi Izraelin për gjenocid në Lindjen e Mesme dhe e krahasoi vendin me Gjermaninë naziste, duke deklaruar se ”Izraeli është Rajhu i Tretë i ri dhe flamuri i tij duhet të duket pikërisht kështu”./   /Ad.Ab./ a.jor.