Tahiri: Dialogu vazhdon pas dy javësh

Takimi i radhës mes Prishtinës dhe Beogradit pritet të mbahet pas dy javësh, në të njëjtin format. Kwshtu ka bërë të ditur shefja e ekipit të bisedimeve, Edita Tahiri.

Pas kthimit nga Brukseli, ku u zhvillua takimi i parë mes saj dhe shefit të ekipit serb, Borko Stefanoviq, Tahiri ka përsëritur se nuk është arritur asnjë marrëveshje në lidhje me temat e diskutuara, por “Beogradi vazhdon të mos shkëputet nga mentaliteti i së kaluarës”.

Mospajtimet më të mëdha, sipas saj, vërehen kur preken interesat kombëtare.

“Kur zgjidhjet preknin interesat nacionale, asnjë palë nuk ishte e gatshme të lëvizë. Ne kemi shkuar me vija të kuqe; ky është një dialog teknik dhe nuk prek çështjen e statusit dhe të pavarësisë”, ka thënë Tahiri.

Në anën tjetër, Lëvizja “Vetëvendosje” ka organizuar një aksion sot në qendër të Prishtinës, duke kundërshtuar fillimin e bisedimeve me Serbinë.

Kjo lëvizje thotë se me hyrjen në bisedime, Kosova po i bën favor Serbisë për t`u integruar më shpejt në BE, ndërsa po dëmton vetveten.