Taksa e re mbi naftën, Grosistët: Do të rrisim çmimin

Tregu i naftës do të paguajë të paktën 5 lekë për litër më shumë taksa që nga dita e djeshme si rezultat i hyrjes në fuqi të taksës së re të automjeteve. Në ligjin e ri taksa e qarkullimit, e cila ishte në vlerë fikse transferohet te karburantet. Mirëpo tregu i hidrokarbureve ka reaguar në mënyrë të unifikuar një muaj më parë kur ligji u miratua në Kuvend duke rritur çmimin e naftës dhe benzinës të paktën me pesë lekë për litër. Kështu, çmimi i një litri naftë shkoi dje në 162 lekë nga 157 lekë që ishte më parë. Në disa pika të tjera niveli i çmimit është edhe më i lartë, deri në 168 lekë. Tabelat e çmimeve u rriten pikërisht se rritja e akcizës së karburanteve do të zëvendësojë taksën qarkullimit. Kështu, taksa e re qarkullimit do të jetë një taksë fikse për litër mbi gazoilin dhe benzinën, të importuara apo të prodhuara në vend, në masën 5 lekë për litër, deri në datën 31.12.2011 dhe, duke filluar nga 1 janar 2012, masa e kësaj takse do të jetë 7 lekë për litër për benzinën dhe gazoilin. Ndërsa taksa e karbonit, që është aktualisht mbi benzinën në masën 1,5 lekë/litri dhe gazoilin në masën 3 lek/litri, do të aplikohet edhe mbi disa kategori të reja nënproduktesh nafte, mbi vajgurin, solarin, mazutin dhe koks nafte. Në këtë mënyrë do të kemi: Taksa e karbonit do të aplikohet mbi prodhimin vendas dhe importin e këtyre nënprodukteve të naftës. Kështu gazoili taksohet me 3 lekë për litër, benzina me 1.5 lekë për litër, solar dhe mazut me 3 lekë për litër, vajguri 3 lekë për litër dhe koks naftë me 3 lekë për kg. Kjo do të thotë se çmimi për të gjitha këto produkte do të jetë në rritje gjatë ditëve në vazhdim. Taksa e regjistrimit të përvitshëm dhe taksa e qarkullimit të përvitshëm të makinave, janë taksa të cilat aplikohen në bazë të parimit të shfrytëzimit të infrastrukturës rrugore dhe të ardhurat prej tyre shkojnë në programet investuese të infrastrukturës rrugore. Parimi i kësaj takse është që ndotësi paguan. Çmimi i naftës këtë vit ka qenë e i lartë për shkak të rritjes në tregun ndërkombëtar, por kohët e fundit pësoi ulje për shkak të nxjerrjes në treg të disa rezervave nga SHBA. Ndërsa në fund të javës që shkoi nafta bruto amerikane iu afrua vlerës së 100 dollarëve për fuçi, e mbështetur kryesisht nga veprimi konkret i eurozonës për krizën e borxhit grek, por edhe nga vendimi i Agjencisë Ndërkombëtare të Energjisë, për të mos hedhur në treg naftën e rezervës së emergjencës.