Të pamposhturit
Juventusi është duke bërë sensacion në futbollin italian, por edhe më gjerë. Skuadra italiane e nxori një barazim të martën mbrëma në Firenze ndaj Fiorentinës, duke e vazhduar serinë e jashtëzakonshme prej 44 ndeshjesh pa humbje. Pasi e përfunduan sezonin e kaluar pa humbje, duke e fituar njëkohësisht titullin e kampionit, Bianconerët e kanë nisur furishëm edhe sezonin aktual.
Kjo seri i ka futur ata në listën e 10 ekipeve me jetëgjatësinë më të madhe pa u mposhtur, të publikuar nga mediat italiane. Në vijim mund ta shihni këtë listë, së cilës i prijnë skuadra afrikane ASEC Mimosas dhe ajo rumune Steaua Bucharest me nga mbi 100 ndeshje pa humbje.
1. ASEC Mimosas: 108 ndeshje (1989-1994)
Ekipi nga Bregu i Fildishtë ishte i pandalshëm për pesë vjet, tre të parët nën drejtimin e francezit Philippe Troussier, i cili më pas drejtoi Nigerinë, Japoninë, Afrikën e Jugut dhe Marseillen. Me portierin e njohur Alain Gouamene, i cili më pas iu bashkua Toulouses së bashku me Donald Sie, Abdoulaye Traore e Basile Aka Kouame, Mimosas e fitoi titullin e kampionit gjashtë herë rresht në Bregun e Fildishtë, para se të ndalej nga SO Armee në humbjen 2:1.
2. Steaua Bucharest: 104 ndeshje (1986-89)
Rumunët patën një seri prej 104 takimesh në tri sezone në të gjitha kompeticionet, duke i fituar tre tituj dhe një kupë evropiane pasi e mundën Barcelonën me penallti në Sevilla. Përpos suksesit në kampionatin rumun, ekipi i Anghel Iordanescut tregoi sukses edhe në Evropë, duke shkuar deri në gjysmëfinale më 1988 dhe në finale në vitin pasues, ku u mposht 4:0 nga Milani legjendar i Arrigo Sacchit.
3. Celtic: 62 ndeshje (1915–17)
Celticu kishte kaluar momente magjike gati 100 vjet më parë, kur e kishte fituar tri herë rresht titullin e kampionit, duke mbetur i pamposhtur në 62 ndeshje. Është një tjetër kuriozitet për këtë klub: në vitin 1916 ata kishin zhvilluar dy ndeshje brenda një dite. Së pari kishin fituar ndaj Motherwell, para se të riktheheshin në shtëpi për ta mundur ekipin Raith Rovers 6-0. Trajneri Maley e kishte marrë në dorë këtë ekip në vitin 1897 dhe kishte qëndruar për rekord prej 43 vjetësh, duke i fituar 16 tituj të kampionit dhe 14 kupa të Skocisë.
4. AC Milan: 58 ndeshje (1991-93)
Arrigo Sacchi ia la në dorë ekipin Fabio Capellos, i cili e udhëhoqi për mrekulli Milanin që ta fitonte titullin e kampionit pa humbje në Serie A në sezonin 1991-92. Rekordi i tyre prej 58 ndeshjeve mori fund falë Faustino Asprillias dhe Parmas në vitin 1993, por kjo nuk shkaktoi ndonjë problem, sepse Don Fabio e mbrojti titullin në dy sezonet e ardhshme para se ta shijonte natën e paharrueshme të Athinës më 1994, kur ekipi i tij e kishte mposhtur Barcelonën me rezultat të thellë 4:0 në finale të Ligës së Kampionëve, e cila konsiderohet si paraqitja me e mirë e një ekipi në histori të këtij sporti.
5. Penarol: 56 ndeshje (1966-69)
Gjiganti uruguaian shkoi deri në 56 ndeshje pa humbje gjatë viteve 60’, duke e fituar ndërkohë Copa Libertadores dhe Intercontinental Cup më 1966. Ajo Libertadores kishte arritur pas njërit prej rikthimeve më të mëdha në histori të këtij kompeticioni. Ata ishin duke humbur 2:0 vetëm 25 minuta pa përfunduar ndeshja, ndërsa shënuan dy herë në 6 minutat e fundit, ndërkohë që fituan 4:2 pas lojës shtesë. Më pas e mundën Real Madridin 4-0 për t’u bërë kampionë të botës. Serisë së suksesit i erdhi fundi në shtator të vitit 1969, por jo para se trajnerët Roque Maspoli e Rafael Milans t’i shtonin dy tituj të kamponit në vitrinat e këtij ekipi.
6. Porto: 55 ndeshje (2010-12)
Andre Villas-Boas kishte menduar se do ta vazhdonte serinë pozitive edhe në Chelsea, kur e la Porton pasi i udhëhoqi ‘Dragonjtë’ duke e fituar ligën portugeze, kupën e shtetit dhe Europa Leaguen. Rruga filloi nën drejtimin e Jesualdo Ferreiras, ndërsa atë e ndoqi AVB. Më pas Porton e mori në dorë Vitor Pereira, i cili e prishi rekordin pas humbjes 3-1 nga Gil Vicente. Ky rekord e mposhti atë të Sir Bobby Robson, i cili kishte regjistruar 53 ndeshje pa humbje në këtë klub në periudhën në mes të viteve 1994 e 1996.
7. Ajax: 52 ndeshje (1994-96)
Van der Sar, Reiziger, binjakët De Boer, Davids, Seedorf, Rijkaard, Blind, Kanu, Overmars, Litmanen – Louis van Gaal. Ajaxi i famshëm luante përmendësh me këta yje dhe konsiderohet si ekipi më i mirë që ka ekzistuar ndonjëherë në Holandë. Gjatë sezonit 1994-95, ata e kaluan tërë edicionin pa humbje në Eredivisie dhe në Ligën e Kampionëve, ku e kishin takuar Milanin në finale, të cilin e mundën falë golit të zëvendësuesit 18 vjeçar Patrick Kluivert. Ata shkuan sërish në finale vitin tjetër, por humbën pas ekzekutimit të penalltive nga Juventusi.
8. Arsenal: 49 ndeshje (2003-04)
Arsene Wenger mund ta kujtojë me ëndje sezonin 2003/04, kur Thierry Henry me shokë nuk dinin të ndaleshin. Ata e fituan titullin e kampionit në Premierligë, duke e përfunduar sezonin pa humbje. Ata u ndalën nga Manchester United, i cili i mposhti 2:0. Më pas u eliminuan nga Chelsea në çerekfinale të Ligës së Kampionëve, por kjo nuk e zbeh periudhën legjendare të ‘Gunners’, që kishin në ekip lojtarë si Sol Campbell, Patrick Vieira, Dennis Bergkamp dhe njeriun e lindur për gol, Henry.
9. Juventus: 44 ndeshje (2011-)
Juventusi u bë vetëm ekipi i tretë në ligën italiane që e përfundoi sezonin pa humbje, duke e fituar Scudetton sezonin që shkoi. Djelmoshat e Antonio Contes do të mundohen ta vazhdojnë serinë prej 44 ndeshjeve pa humbje, pasi barazuan të martën mbrëma në Firenze ndaj Fiorentinës. ‘Zonja e Vjetër’ e vazhdoi formën e shkëlqyeshme, përkundër suspendimit të Contes prej 10 muajsh. Ata bënë rikthim sensacional javën e kaluar në Ligën e Kampionëve, duke e nxjerrë një pikë në Stamford Bridge ndaj kampionit aktual të Evropës, Chelsea, edhe pse ishin duke humbur 2-2. Përfundimisht Bianconerët nuk kanë të ndalur.
10. Boca Juniors: 40 ndeshje (1998-99)
Boca Juniors konsiderohet njëri prej ekipeve më të mira në Amerikën e Jugut. Nën drejtimin e trajnerit Carlos Bianci, ekipi verdh e kaltër kishte regjistruar 40 ndeshej pa humbje, duke i rrëmbyer dy tituj të kampionit në atë periudhë. Seria e tyre pozitive mori fund kur pësuan humbje nga Independiente. Por, kjo ka mbetur periudha më e mirë në histori të klubit, e cila vazhdoi me triumfin në tri nga katër Copa Libertadores dhe dy tituj të botës, duke i mundur Real Madridin më 2000 e Milanin me penallti më 2003. Trajneri aktual i Bocas, Julio Falcioni iu afrua atij rekordi, duke shënuar 33 ndeshje pa humbje dhe duke e fituar titullin Apertura sezonin që shkoi, po u mposhtën në shtëpi nga Independiente me rezultat 5-4 në shtëpi.