Telco synonte MVNO’në

Këshilltari i transaksionit Telco AG, që e ka bërë horë PTK’në në një raport të vlerësimit, kishte konkurruar në vitin 2008 për Operator Virtual të kësaj kompanie. Në një dokument të siguruar nga Expressi, Telco ishte e dyta në selektim. Konkurrent kishte Dardafonin, tash Z Mobile. A është ky konflikt interesi? Nga Albulena Maloku më 12 gusht 2011 në ora 08:10

Telco AG, që tash po bënë vlerësimin e Postës dhe Telekomit të Kosovës ka konkurruar në vitin 2008 për Operator Virtual. Kjo kompani ka qenë vetë konkurruese në tenderët e PTK`së.

Në fakt, Telco AG, kishte humbur garën për MVNO me Dardafonin e atëhershëm, tash Z Mobile.

Tri vjet më vonë, Telco kthehet si këshilltar i transaksionit.
Këtë e ka vërtetuar Express përmes një dokumenti ku ky Këshilltar shihet i radhitur në tender si operatori i tretë ekonomik.

“Në garën për tenderin e operatorit virtual të telefonisë mobile ishin Dardafone, Telco dhe Tink, të cilat kishin dorëzuar edhe ofertat e tyre për tender”, thuhet në dokumentin që ka siguruar gazeta.

Madje oferta e Telco`s, sipas këtij dokumenti, ishte më e favorshme, se ajo e Dardafonit.

Kjo ndoshta edhe ka bërë që tash, pas tri vitesh të kthehet me një goditje të madhe për PTK-në, duke shkruar se kjo ndërmarrje ka aplikim të prokurimit me metoda të vjetruara, aspekt të keq teknologjik, të pa përgatitur në çështjet e marketingut...

Në krahasim me Dardafonin, e cila në ofertën e saj kishte ofruar produkte dhe shërbime, të cilat Vala, nuk do të ishte në gjendje t’i përballonte me pajisjet e saj teknologjike, Telco kishte një ofertë shumë më të favorshme.

Kjo kompani kishte një pasqyrë më realiste dhe e kuptonte shumë më mirë tregun e telefonisë mobile në Kosovë.

“Dardafone synonte që punën e saj ta fillonte në pikat elektronike të shitjes, përkundër asaj që Telco planifikonte që së pari të niste me shërbimet bazike të komunikimit dhe të zhvillonte tregun bashkë me Vala-n”, thuhet në dokument.
Kompania austriake, në ofertën e saj kishte në plan edhe hapjen e një qendre të thirrjeve në Kosovë, me të cilën do të krijonte vende të reja pune për rreth 30 njerëz në fillim,duke vazhduar me rritjen e tyre deri në 50 veta në dy vitet e para.
Planet e saj për investime arrinin vlerën e 15 milionë euro, që në fillim.

Për të gjithë resorët - postën, telekomin, IPTV-në dhe Vala-n këshilltari austriak i ka cilësuar si të dobëta dhe jofunksionale.

PTK, më herët e ka quajtur këtë raport si jashtëzakonisht të pavërtetë dhe e ka cilësuar si shumë të dëmshëm për këtë kompani.

Telco AG ka goditur edhe kontratën e postës më ish konkurrentin e tij Operatorin Virtual Dardafon – Z Mobile.

“Kontrata me dardafon-in ka rreziqe komerciale që mund të dëmtojnë fuqinë konkurruese të Vala-s”, ka thënë Telco AG.

Telco AG, është kompani austriake dhe tash sa kohë është në luftë me drejtuesit e Postës dhe Telekomit të Kosovës.

Operatorët virtual në Kosovë

Në Kosovë tanimë janë licencuar dy operatorë virtualë nga Autoriteti Rregullator i Telekomunikacionit, “Dukagjini Telecomunication”, dhe “Dardaphone”, të cilët janë pajisur me licenca 15-vjeçare nga ART-ja.

MVNO në bazë të licencës është operator që nuk posedon spektër frekuencor, por që shfrytëzon tërë infrastrukturën e kompanive mobile ekzistuese.