Tenderët 'përplasin' pozitën dhe opozitën

Debati parlamentar, sipas kërkesës së deputetes Alma Lama, lidhur me shpenzimin e fondeve publike nga ana e Qeverisë së Kosovës, ka ngjallur akuza e kundër akuza mes pozitës dhe opozitës. Përderisa të fundit, kanë kritikuar, përfaqësues të pushtetit, akuzat i kanë quajtur si të pabazuara dhe të paqëndrueshme.

Deputetja Lama ka akuzuar Qeverinë e Kosovës se ka shpërblyer kompanitë me tender të cilat i kanë ndihmuar asaj gjatë fushatës elektorale.

Sipas saj, këta tenderë kapin shumën e qindra miliona eurove. Gjithashtu, ajo ka përmendur edhe raportet e UNDP-së për varfërinë dhe papunësinë në Kosovë, të cilat paraqesin shifra alarmuese.

Por deputeti i PDK-së, Ramiz Lladrovci, në emër të Grupit Parlamentar të PDK-së, ka mohuar një gjë të tillë, duke i thënë deputetes Lama se kompanitë të cilat kanë marr tender nga Qeveria e Kosovës janë sponsorë të Lëvizjes Vetëvendosje.

Sipas tij, Qeveria Thaçi nuk bënë këto lloj dallime, ashtu siç i paraqet Lëvizja Vetëvendosje.

“Ju zonja Lama dhe koleg e juaj deputet të Lëvizjes Vetëvendosje po mundoheni të paraqiteni si engjëj në Kuvend të Kosovës”, ka theksuar Lladrovci.

Kritika ndaj qeverisë ka shfaqur edhe subjekti më i madh opozitar LDK.