Terror me armë në Gjirokastër, vetëplagoset

GJIROKASTER- I dehuri terrorizon me kallash banorët e qytetit, e më pas vetëplagoset nga pakujdesia. Ngjarja ndodhi dje në mes të ditës në qytetin e Gjirokastrës, në lagjen “Manalat”. Sipas dëshmitarëve, 64- vjeçari, Besim Mamo, ishte kthyer dje në shtëpi rreth orës 13:00 në gjendje të dehur. Ai ishte ngjitur në katin e dytë të banesës dhe prej andej kishte marrë një armë automatike, të cilën e mbante pa leje. Më pas, ai ka dalë në tarracën e shtëpisë duke qëlluar në ajër me breshëri. Banorët e lagjes janë detyruar të futen të gjithë nëpër shtëpitë e tyre, pa guxuar të dalë asnjëri, pasi arma përdorej në mënyrë të pakontrolluar nga 64- vjeçari. Sipas policisë, Mamo, plagosi veten në mënyrë aksidentale në momentin që po zbriste shkallët drejt portës hyrëse të banesës. Policia e gjeti Mamon të plagosur dhe menjëherë e transportuan atë për në spital. Por plagosja ishte mjaft e rëndë, pasi plumbi i kishte përshkuar nofullën, ndaj kirurgët vendosën që të transportohej me helikopter për një ndërhyrje më të specializuar në Spitalin Ushtarak të Tiranës. Policia sekuestroi armën automatike model “56”. p.n