Tetovë, firmoset peticioni kundër raportit të Martyt

Me thirrjen "Të nderuar studentë, nënshkruani kundër raportit të Dick Martit", në Universitetin Shtetëror të Tetovës, në Maqedoni, filloi sot të firmoset peticioni kundër raportit të Dick Martit, njoftoi zyra e shtypit e USHT-së.

"Raporti i Dick Martit për përfshirjen e drejtuesve të UÇK-së në trafiqe dhe në afera të paligjshme është i pabazë dhe si i tillë duhet të kundërshtohet", theksoi Merale Xhelili, studente e USHT-së, nënshkruese e peticionit të lartpërmendur.

"Ky dokument, i paraqitur nga europarlamentari zviceran në Këshillin e Evropës, kategorikisht duhet të kundërshtohet përderisa njollos figurat historike të shqiptarëve dhe mbarë kombin tonë", deklaroi një student tjetër, i cili hodhi firmën e tij në peticionin kundër raportit të Martyt.

Miftar Emini, përfaqësues i Parlamentit të Studentëve të USHT-së, i angazhuar për peticionin në fjalë konfirmoi se studentët e të gjitha fakulteteve të USHT-së, në Tetovë kanë filluar ta nënshkruajnë këtë peticion dhe numri i tyre është i konsiderueshëm.

"Për të firmosur këtë peticion mjafton letërnjoftimi i çdo studenti për t`u bashkuar me qindra studentë dhe profesorë që kanë firmosur këtë peticion edhe në USHT", tha Emini.

Organizatorët e peticionit bënë të ditur se peticioni kundër raportit të Dick Martyt në USHT do të nënshkruhet edhe gjatë ditëve në vijim dhe se nënshkrimet e grumbulluara do të dorëzohen në selinë e Këshillit të Evropës.