Thaçi: Miratimi i buxhetit, tregues i dialogut dhe bashkëpunimit

Prishtinë - Kryeministri kosovar , Hashim Thaçi, pas miratimit të Ligjit për Buxhetin për vitin 2009 është shprehur se ky vendim është një përgjigje e mirë për të gjithë ata që mendojnë se politika kosovare nuk mund të punojë e bashkuar. “Ky buxhet dëshmon të kundërtën. Së bashku, ne përgatitëm një buxhet të drejtë dhe të balancuar, për të gjithë qytetarët e Kosovës. Së bashku, në përgatitëm një buxhet që do të shërbejë si bazament për një Kosovë të përparuar dhe të suksesshme. Së bashku, ne posa votuam buxhetin e parë të Republikës së pavarur të Kosovës. Ky është moment i shënuar në historinë tonë” ka deklaruar Thaçi.

Sipas tij, gjatë përgatitjes së këtij buxheti, janë dëgjuar zërat e kërkesave të qytetarëve të Kosovës. “Gjatë vitit 2009, Kosova do të shpenzojë një miliard e nëntëdhjetë e katër milionë euro për investime kapitale, arsim, mirëqenie sociale dhe programe të tjera për qytetarët e Kosovës. Do të krijohen vende të reja të punës. Pagat do të rriten. Fëmijët tanë do t’i përgatisim për të konkurruar në tregun global të punës”, vijoi ai.