Thaçi takon parlamentarët evropianë

Kryeministri Hashim Thaçi ka pritur sot pasdite një delegacion të Komisionit të Punëve të Jashtme dhe të Nën Komisionit për Siguri dhe Mbrojtje të Parlamentit Evropian.

Pas takimit nuk ka pasur deklarime për gazetarë.

Sipas një komunikate për media, kryeministri Thaçi ka falënderuar institucionet e BE-së për bashkëpunimin e ngushtë me Qeverinë e Kosovës dhe mbështetjen që po i japin Kosovës në procesin e integrimit.

“Kryeministri Thaçi ka premtuar se Qeveria e Kosovës është e përkushtuar që të përmbush të gjitha obligimet ndaj BE-së dhe se bashkëpunimi me mekanizmat BE-së është një ndër prioritetet e larta të saj”, thuhet në komunikatë.

Në takim thuhet se kryeministri Thaçi ka vlerësuar situatën e sigurisë stabile dhe të qëndrueshme dhe se institucionet e sigurisë janë të përkushtuara për të siguruar mirëqenien dhe lirinë e gjithë qytetarëve të Republikës së Kosovës pa dallim.

“Qeveria e Kosovës është e angazhuar të zbatojë strategjinë e saj për pjesën e veriut të Kosovës, që ka për qëllim të sigurojë zbatimin e rendit dhe ligjit dhe fillimin e investimeve socio-ekonomike edhe në këtë pjesë të vendit”, ka thënë kryeministri Hashim Thaçi.

Në takim, përfaqësuesit e Parlamentit Evropian i kanë dhënë mbështetje procesit të normalizimit të marrëdhënieve ndërshtetërore mes Kosovës dhe Serbisë, proces ky që ndërlidhet me përmbushjen e standardeve të integrimit të të dyja vendeve në Bashkimin Evropian.