Thoma Miço: Gjatë 2010, pritet rritje e papunësisë në vend

Gjatë vitit 2010 pritet të këtë një numër të madh të të papunëve në Shqipëri, si dhe një numër në rritje të emigrantëve drejt vendit tonë. Të dhënat bëhen të ditura nga Shërbimi Kombëtar i Punësimit, të cilat kanë pohuar ditën e djeshme gjatë analizës një vjeçare të Shërbimit Kombëtar të Punësimit. Ku ndër të tjera ky institucion paralajmëron një rritje të numrit të të papunëve në vendin tonë në këtë periudhë, si pasojë e prekjes së biznesit nga kriza ekonomike.

Drejtori i këtij institucioni, Thoma Miço, në analizën vjetore deklaroi se fluksit të të papunëve po i shtohen dhe emigrantët e kthyer nga shtetet fqinje, Italia e Greqia. Presim një rritje të numrit të të papunëve në vend dhe këtu përfshihen dhe emigrantët e kthyer. Mund të themi se në sportelet e zyrave tona rajonale të punësimit janë regjistruar 90 emigrantë në rrethet Tiranë, Korçë dhe Shkodër. Këta janë kryesisht punëtorë ose pa profesion. Këta kthehen nga emigrimi në Itali e Greqi. Mendojmë se numri i tyre është më i madh, por, pavarësisht se nuk paraqiten në zyrën e Punësimit, për tu regjistruar si të papunë, pohoi gjatë analizës Miço. Gjatë analizës u theksua se  problem për punësimin mbetet mosha e madhe e punëkërkuesve të papunë dhe mungesa e arsimimit të tyre. Sipas të dhënave të zyrave rajonale të punësimit, rreth 31 për qind e tyre janë mbi 45 vjeç dhe niveli arsimor i ulët mbi 53 për qind raportojnë se kanë vetëm arsimin 8 vjeçar. Aktualisht numri i punëkërkuesve në Shqipëri është 10047 persona të cilët përfituan gjatë vitit 2009 pagesën e papunësisë. Por, ky numër po vjen gjithnjë e në rritje e për këtë arsye, një nga prioritetet e 2010 është punësimi i 11500 personave. Sipas të dhënave të ministrisë së punës, në Shqipëri numërohen mbi 140 mijë persona të papunë çka ka rritur nivelin e papunësisë në vend në 13 për qind. Megjithatë, gjatë analizës u bë me dije se së shpejti, për të gjithë punëkërkuesit do të hyjë në funksion dhe punësimi online, i cili do të shtrihet në qarqet kryesore të vendit. Një faktor negativ gjatë vitit 2010 për vendin tonë do të jetë dhe shtimi i emigrantëve të huaj në Shqipëri, që do të thotë më pak mundësi punë për një shqiptarë.