Tifozët mirëpresin Shaqirin
Xherdan Shaqiri të martën mbrëma e ka zhvilluar ndeshjen e parë me skuadrën e tij të re, Bayern Munchen. Futbollisti kosovar ka luajtur gjatë 90 minutave në miqësore ndaj Unterhachingut, të cilën ndeshje e fituan ‘bavarezët’ me rezultat 1:0.
Debutimi i Shaqirit është mirëpritur nga tifozët e gjigantit gjerman, të cilët vazhdimisht thërrisnin emrin e tij. Edhe pse ishte vetëm një ndeshje miqësore, ajo mbrëmje do të mbetet gjatë në kujtesën e reprezentuesit zviceran, i cili gjatë kësaj vere nga Baseli u transferua në Bayern për rreth 11 milionë euro.
“Këtë moment e kam pritur që një kohë të gjatë. Çdo fillim është i vështirë, sepse ne vetëm që një javë jemi këtu të grumbulluar. Andaj, duke pasur parasysh këtë, sa për këtë fillim jam i kënaqur. Vërtet, në këtë fillim po ndihem mirë”, ka deklaruar Shaqiri pas ndeshjes, i cili ishte i befasuar me pritjen e mirë që ia bënë tifozët bavarezë, të cilët nuk i ka lënë pa i falënderuar, duke u premtuar se do ta japë maksimumin për skuadrën e re.
Edhe pse gjilanasi luajti gjatë gjithë këtij takimi, kjo nuk garanton minutazh të njëjtë për të edhe për ndeshjet e ardhshme, sepse siç dihet ai do të ketë konkurrentë të fortë për të zënë vend në formacionin bazë të Bayernit, siç është Arjen Robben e shumë të tjerë.
Megjithatë, duke qeshur, Shaqiri ka bërë me dije se në ‘Allianz Arena’ ka shkuar me qëllim që të luajë sa më shumë që është e mundshme. “Ende është herët për të folur rreth zënies së një vendi të rregullt në formacion. Konkurrenca është e madhe, por një gjë është e sigurt se unë synoj të luaj sa më shumë, ashtu siç duan të gjithë futbollistët tjerë të Bayernit”, ka theksuar Shaqiri.
Ky i fundit nga mediat gjermane po cilësohet si një yll i ri i mundshëm që mund të shpërthejë në Bundesligë, bashkë me kosovarin tjetër Granit Xhakën, i cili po ashtu në këtë verë e kompletoi transferimin e tij nga Baseli në Monchengladbach.