Tiranë, vritet partneri i Inis Gjonit, Arjan Selimi

(E PERDITESUAR)- Një prej personazheve të njohur të botës së krimit, Arjan Selimi, është vrarë mbrëmjen e sotme në Tiranë. Vrasja ka ndodhur tek ish-Parku i Autobusave, ndërsa ende nuk dihen autorët dhe motivet e këtij krimi.

Selimi është ekzekutuar sapo ka dali nga tuneli i pallatit ku jetonte, me një breshëri automatiku.

Trupi i Selimit, 37 vjeç u gjet i pajetë pranë automjetit të tij, poshtë një pallati 8 katësh, ndërsa dëshmitarë pohojnë se janë dëgjuar disa të shtëna armësh në zonë.

Zona ku u gjet trupi i Selimit është pa ndriçim.

Dyshohet se Arjan Selimi ka tentuar të hipte në një automjet në momentin që është sulmuar me armë nga 2 persona, teksa ka dalë nga banesa e tij, në rrugën Babë Rexha.

Në vendngjarje janë gjetur 6 gëzhoja, por do të jetë ekspertiza nga kriminalistika që do të përcaktojë llojin e armës së përdorur për ekzekutim. Nga të shtënat e armës, ka mbetur i plagosur edhe 20-vjeçari Kledis Kola, i cili është dërguar menjëherë në Spitalin Ushtarak.

Arjan Selimi, i njohur ndryshe dhe me emrin Armand Andoni, ra në pranga në sajë të operacionit të koduar Kompas, i zhvilluar në 23 qershor te vitit 2004 në Shqipëri, SHBA, Itali dhe Kosovë. Në pranga ranë më shumë se 40 persona, por vetëm 8 prej tyre u akuzuan për trafik ndërkombëtar lëndësh narkotike. Drejtues i rrjetit u cilësua Arjan Selimi, i cili u dënua me 16 vjet heqje lirie.

Por, më 9 maj të këtij viti, Gjykata e Lartë riktheu për rigjykim dosjen në ngarkim të Arian Selimit, ndërsa me datë 16 shtator të po këtij viti Gjykata e Krimeve të Rënda i hoqi atij masën e sigurisë për tejkalim të afateve të paraburgimit. Prej kësaj date Arian Selimi ishte i lirë, ndërsa gjykata vazhdoi procesin në ngarkim të tij në gjendje të lirë.

Arjan Selimi ka lindur në vitin 1974, në Shkodër. Në kryeqytet ai njihet si një biznesmen i fuqishëm. Ai zotëron disa prej lokaleve më me emër në kryeqytet, në të cilat të rinjtë kalojnë pjesën më të madhe të kohës. Para arrestimit, 36-vjeçari kishte katër vjet që ishte kthyer nga Shtetet e Bashkuara të Amerikës, ndërkohë që familja e tij jeton ende atje.

Lidhja me Inis Gjonin

Arjan Selimi, përveçse një njeri i njohur për botën e krimit, ka qenë në qendër të medias shqiptare edhe prej faktit të lidhjes së tij me prezantuesen dhe regjisoren Inis Gjoni. Me këtë të fundit. Selimi ka pasur një lidhje prej disa vitesh. Madje, edhe pse kaloi gjashtë vite në burg, Inisi vazhdoi që të qëndronte e lidhur me të. Lidhja e tyre u bë edhe më e bujshme pas publikimit të një video të marrë në telefonin e Selimit, në të cilin ai kishte filmuar Inisin në momente intime dhe duke marrë drogë. Pas lirimit të Selimit më 16 shtator, Inisi vendosi që të bashkëjetojë me të, ndërsa edhe u martuan bashkë. Madje, Inisi Gjoni tashmë pret edhe një fëmijë nga Arjan Selimi, që u ekzekutua në mënyrë mafioze.