Topalli-Erdogan: Shqipëria dhe Turqia, partnere strategjike për sigurinë në rajon
Kryeministri i Turqisë, Rexhep Taip Erdogan, i rezervoi një takim të veçantë kryetares së Kuvendit të Shqipërisë, Jozefina Topalli. Duke i uruar mirëseardhjen dhe duke e falënderuar për praninë e saj në Samitin botëror “Të drejtat e grave lidhin Lindjen me Perëndimin”, kryeministri Erdogan theksoi se Turqia dhe qeveria e tij po i kushtojnë gjithnjë e më tepër vëmendje çështjes së promovimit të të drejtave të grave. “Turqia dhe Shqipëria mbeten jo vetëm vende të lidhura nga tradita historike e miqësisë dhe bashkëpunimit, por gjithnjë e më shumë ato po kthehen në dy partnere strategjike dhe faktorë të rëndësishëm të stabilitetit dhe sigurisë në rajon. Në katër vitet e fundit marrëdhëniet midis dy vendeve janë intensifikuar dhe në nivelet më të larta. Shqipëria është vendi që kam vizituar më shpesh”, - tha ai. Në bisedë u shpreh kënaqësia për rritjen e bashkëpunimit ekonomik dhe tregtar me tregues dinamikë dhe u shpreh vullneti për rritjen e mëtejshme të bashkëpunimit në të gjitha fushat, me interes reciprok. Gjatë bisedës u theksua se biznesi turk vlerëson lehtësimet dhe klimën e favorshme që është krijuar në Shqipëri për investitorët e huaj. Të dy bashkëbiseduesit u shprehën se synimi dhe ambicia për të kapërcyer vlerën e një miliard dollarëve të shkëmbimeve tregtare nëpërmjet dy vendeve.
Berisha takon sekretarin e Përgjithshëm të Shoqatës së Traktatit të Atlantikut
Kryeministri Berisha priti dje në një takim sekretarin e Përgjithshëm të Shoqatës së Traktatit të Atlantikut, Troels Froling. Në këtë takim dy politikanët biseduan për kontributin e Shoqatës së Traktatit të Atlantikut për informimin e publikut dhe promovimin e vizionit për paqen, sigurinë globale dhe vlerave të lirisë e demokracisë që mbron Aleanca e Atlantikut të Veriut. Shoqata e Traktit të Atlantikut të Veriut është një organizatë ndërkombëtare joqeveritare e themeluar më 18 qershor 1954, për të mbështetur misionin e NATO-s përmes ndërgjegjësimit dhe mbështetjes së opinionit publik ndërkombëtar ndaj vlerave të përbashkëta euroatlantike që përkrah dhe mbron NATO-ja. Shoqatat e vendeve anëtare të kësaj organizate ndërkombëtare të Atlantikut kanë në radhët e tyre personalitete të shquara të politikës, jetës akademike, shoqërisë civile dhe të tjerë, të më shumë se 42 vendeve. Sekretari i Përgjithshëm i Shoqatës së Traktatit të Atlantikut, zoti Troels Froling, i shprehu mirënjohjen kryeministrit Berisha për mbështetjen që qeveria shqiptare po i jep organizimit të Asamblesë së Përgjithshme të 56-të të Shoqatës së Traktatit të Atlantikut në Tiranë, në vjeshtë të vitit 2010. Në këtë ngjarje të rëndësishme pritet të marrin pjesë zyrtarë të lartë të NATO-s, personalitete të shquara nga 42 vendet anëtare e partnere të NATO-s që janë anëtarë të Shoqatës së Traktatit të Atlantikut, duke përfshirë edhe personalitete të larta politike të vendeve të rajonit tonë të Ballkanit Perëndimor.
10 Mars 2010