Topalli: Kemi të drejtë të shqyrtojmë dhe meritat e të përzgjedhurve nga Topi

Kryetarja e Kuvendit, Jozefina Topalli, reagoi dje përmes zëdhënëses së saj në lidhje me dekretimin e anëtarëve të Gjykatës së Lartë. Me anë të një deklarate, Topalli thekson se nuk po bën asnjë shkelje, por po i përmbahet vendimit të Gjykatës Kushtetuese në lidhje me këtë çështje. Reagimi vjen pas deklaratës së presidentit, se nuk duhet të ketë vonesa dhe dekreti të futet për shqyrtim. “Për shkak të mediatizimit për gjoja bllokim nga Kuvendi të dekreteve të presidentit për emërimin e gjyqtarëve të Gjykatës së Lartë, duhet të informoj se të gjitha qëndrimet e Kuvendit përcaktohen nga zbatimi me seriozitet i vendimit nr. 2, datë 18.01.2005 i Gjykatës Kushtetuese, që trajton marrëdhëniet e presidentit me Kuvendin, rolin e secilit në emërimit e gjyqtarëve të Gjykatës Kushtetuese dhe Gjykatës së Lartë”, - tha zëdhënësja e Kuvendit, Suela Ruseti.

“Vendimi i Gjykatës Kushtetuese ka forcën dhe vlerën e ligjit kushtetues në praktikën juridike. Ky vendim i ndërmarrë pas kërkesës së presidentit të kohës, më 18 janar 2005, për të qartësuar rolin dhe të drejtat e tij dhe të Kuvendit në emërimin e gjyqtarëve të Gjykatës Kushtetuese dhe të Gjykatës së Lartë, thekson: “qëllimi i hartuesve të Kushtetutës ka qenë që emërimi i gjyqtarëve të mos mbetej vetëm në kompetencën e një organi… Pjesëmarrja e Kuvendit të Shqipërisë në këtë proces ka për qëllim balancimin e kompetencës së Presidentit të Republikës në emërimin e gjyqtarëve, dhe kjo vjen në harmoni edhe me parimin e ndarjes dhe balancimit ndërmjet pushteteve. Interpretimi, sipas të cilit emërimi i përket, në mënyrë ekskluzive, një organi politik me natyrë individuale (kryetarit të shtetit), thotë vendimi i Gjykatësë Kushtetuese, nuk do të ishte në pajtim me standardin përkatës në këtë fushë”.

Gjykata përcakton se procesi i emërimit i gjyqtarëve në Gjykatën e Lartë dhe atë Kushtetuese duhet të jetë proces koordinimi, bashkëpunimi dhe konsensusi dhe jo veprimi të njëanshëm, që krijon probleme të panevojshme. Lidhur me këtë , ky vendim thotë: “Sistemi i emërimit i pranuar nga Kushtetuta e Shqipërisë ka në esencë kooperimin institucional të Presidentit të Republikës dhe të Kuvendit të Shqipërisë”, “pëlqimi që kërkojnë dispozitat e mësipërme, nënkupton një lloj konsensusi midis këtyre organeve kushtetuese që përfshihen në procesin e emërimit të gjyqtarëve të gjykatave më të larta”, “ky sistem emërimi, i adoptuar nga Kushtetuta, i vë subjektet që përfshihen në të, para kërkesës së respektimit të parimit të luajalitetit kushtetues, i cili shpreh, në thelb respektin e ndërsjelltë nga secili subjekt ndaj kompetencave të tjetrit, si dhe nënkupton krijimin e një raporti bashkëpunimi midis tyre”. Vendimi i Gjykatës Kushtetuese i njeh Kuvendit jo të drejtën e shqyrtimit formal, por të drejtën e shqyrtimit në themel e për meritë, duke i dhënë atij një epërsi të qartë në trajtimin e këtij problemi”, - vijoi Ruseti.

Ajo tha se nuk duhet të shqyrtohet vetëm rregullshmëria ligjore, por dhe meritat e përzgjedhjes. “Tingëllojnë qesharake dhe absurde pretendimet se Kuvendi po merr kompetenca të tjera, pasi vendimi i Gjykatës Kushtetuese përcakton: “Kuvendi ka pasur dhe ka një rol substancial… Sipas neneve 125/1 dhe 136/1, Kushtetuta parashikon dhënien e një pëlqimi të vërtetë nga Kuvendi i Shqipërisë. Kjo nënkupton që përfshirja e Kuvendit të Shqipërisë në këtë proces ka të bëjë jo vetëm me shqyrtimin e rregullshmërisë juridike, por edhe të meritës së zgjedhjes së bërë nga ana e Presidentit të Republikës”.