Topalli: "Prehri i nënës është akademia më e madhe e botës"

 

Kryetarja e Kuvendit, Jozefina Topalli, priti në mjediset e Kryesisë së Kuvendit qindra nëna, artiste të mirënjohura, këngëtare, shkrimtare e mësuese me rastin e 9 Majit, Ditës ndërkombëtare të Nënës. Në një atmosferë krejtësisht të veçantë e festive, Kryetarja e Kuvendit u përcolli urimet më të mira nga zemra nënave dhe fëmijëve të tyre, miqve më të veçantë në Kuvendin e Shqipërisë. "Sot është një festë krejt ndryshe nga festat e tjera. Është festa më e bukur, është festa më e ëmbël, është festa më madhështore. Është dita e nënave tona. Gëzuar festën të dashura nëna! Gëzuar të gjithave! Gëzuar fëmijëve, për nënat e tyre të mrekullueshme", tha kryeparlamentarja. Duke vlerësuar rolin e nënës, zonja Topalli tha se janë nënat nga ku fëmijët mësojnë të mirat e jetës. "Prehri i nënës, tha Kryetarja e Kuvendit, është akademia më e madhe e botës. Unë këtë e besoj plotësisht. Fëmijët tanë mendojnë se ne jemi të forta, të hekurta, sepse ne nuk mërzitemi kurrë, nuk dorëzohemi kurrë". Duke folur për rolin e nënës në shoqëri dhe familje, kryeparlamentarja tha se gratë mbeten personazhet më të forta dhe të durueshme në shoqërinë tonë. "Sepse edhe kur qajmë, edhe kur mërzitemi, edhe kur qeshim ne themi: Do të vazhdojmë përsëri. Do të vazhdojmë dhe do të vazhdojmë. Edhe në momentet më të vështira, edhe kur qesh, edhe kur nuk qesh, edhe kur bashkëshortin e ka në emigracion, edhe kur është nënë me fëmijë, ajo është timoniere. Nuk dorëzohet kurrë", tha Topalli. Kryetarja e Parlamentit, gjatë bashkëbisedimit me gratë e ftuara dje në oborrin e kryesisë së Kuvendit, tha se gratë janë vetëm demokrate. "Nënat, tha Kryetarja e Kuvendit edhe pse të ndryshme nga njëra-tjetra, kanë një gjë të përbashkët, gjuhën e amësisë që  lidh nënën me fëmijën. Burrat mund të jenë të majtë dhe të djathtë, gratë janë demokrate, demokrate dhe vetëm demokrate"!