Topalli: Transit për gazin e naftën

Kryetarja e Kuvendit, Jozefina Topalli, zhvilloi një vizitë zyrtare disaditore në Azerbajxhan, për herë të parë e këtij lloji në shtetin e pasur me naftë e gaz. Kryeparlamentarja u takua me autoritetet më të larat të vendit, duke filluar nga homologu i saj, por edhe Presidentin dhe Kryeministrin azerbajxhanas. Në takimin me Kryeministrin Rasizadeh, e shoqëruar edhe nga deputeti Ben Blushi, Topalli u shpreh se Shqipëria është një vend i përshtatshëm për të bërë transitimin e naftës dhe gazit të këtij vendi drejt tregut të Perëndimit. Në këtë kontekst Kryetarja e Kuvendit theksoi rëndësinë për njohjen e Shqipërisë si vend transit të kalimit të linjave të gazit dhe naftës dhe kërkoi angazhimin e drejtpërdrejtë të Kryeministrit të Azerbajxhanit, çka u prit shumë pozitivisht. Gjatë vizitës së saj në Baku Kryetarja e Kuvendit u takua edhe me ministrin e Zhvillimit Ekonomik zotin Shahin Mustafajev. Ai i shprehu gatishmërinë e tij për të konkretizuar me projekte bashkëpunimin ekonomik midis dy vendeve në shumë fusha me interes reciprok, kryesisht në fushën e energjisë. Topalli u prit edhe nga Presidenti Ilham Aliyev. Presidenti Aliyev mirëpriti kërkesën e Kryetares së Kuvendit në përfshirjen e Shqipërisë si vend i rëndësishëm transiti në projektet e mëdha të linjave gazsjellëse. Për sa i përket Kosovës, Presidenti Aliyev u shpreh se do t'i kërkonte Kryeministrit të vet të gjente mënyrat për të mbështetur një popull mik dhe për t'i dëshmuar atij solidaritet të plotë.