Turqi, PKK hedh poshtë përgjegjësinë për atentatin

Turqia po përballet me probleme dhe trazira duke filluar nga atentati në Stamboll ku humbën jetën 17 vetë dhe më pas konsultimet e Gjykatës Kushtetuese turke për ndalimin e partisë qeveritare AKP. Fajtore për sulmin u konsiderua PKK-ja, e cila ka hedhur poshtë çdo përgjegjësi lidhur me këtë ngjarje. Drejtuesi i seksionit politik të rebelëve, Zubeyir Aydar hodhi poshtë çdo lloj përgjegjësie të organizatës kurde megjithatë nuk dihet nëse një deklaratë e tillë i përgjigjet së vërtetës. Ndërkohë kryeministri turk Taip Erdogan i bëri thirrje popullit për t’u bashkuar kundër terrorit sepse nëse mbështeten organizatat terroriste, atëherë terrori do të ndihet më i fortë dhe i konfirmuar. Thirrja e Erdoganit për bashkim kombëtar ndoshta ka të bëjë edhe me procesin e ndalimit të partisë qeverisëse AKP.
Prokuroria e përgjithshme që ka ngritur padinë, e akuzon partinë islamike-konservative, AKP për groposjen e laicizmit në Turqi dhe instalimin e një Republike islamike. Thuhet se ndalimi i partisë është gati i sigurtë, pasi 8 nga të 11-të gjykatësit konsiderohen si kritikë të AKP-së dhe vetëm 7 vota mjaftojnë për mbylljen e votimit. Por nuk dihet nëse vendimi do të jetë kundër AKP-së. Këshilltari i Gjykatës, Osman Can është shprehur për rrëzimin e padisë dhe kërkesën për ndalimin.

30 Korrik 2008