Union Bank hap degën e saj të re

 

Përvjetori i parë i bashkëpunimit midis Union Bank dhe Bankës Evropiane për Rindërtim dhe Zhvillim (BERZH) është festuar me përurimin e degës së 31-të Union Bank në Tiranë. Ky festim u zhvillua në ambientet e degës më të re të Union Bank, degës së 31-të në rang kombëtar dhe të 13-të në qytetin e Tiranës, e cila ndodhet afër Gardës së Republikës. Në këtë ceremoni morën pjesë Peter Reiniger, Drejtor i Grupit të Biznesit për Ballkanin Perëndimor dhe Evropën Qendrore në BERZH, përfaqësues të lartë së Bankës së Shqipërisë dhe Ministrisë së Financave dhe të ftuar të tjerë të rëndësishëm. Bashkëpunimi i Union Bank me EBRD (BERZH) u konkretizua në vitin 2008, vit kur Banka Evropiane për Rindërtim dhe Zhvillim (BERZH) u bë aksioner i Union Bank me një paketë aksionesh prej 12.5%. Union Bank u themelua në vitin 2005 me kapital plotësisht shqiptar, me aksioner kryesor njërin prej Institucioneve më të suksesshme të sistemit financiar shqiptar - Unioni Financiar Tiranë, përfaqësues i Western Union për Shqipërinë, Kosovën e Maqedoninë. Blerja e paketës së aksioneve të Union Bank prej BERZH, nuk është thjesht një investim që do të forcojë Union Bank, por një veprim i cili do të ketë ndikim pozitiv në sektorin financiar të vendit duke forcuar konkurrencën dhe duke vendosur standarde të larta të qeverisjes korporative dhe administrimit të biznesit.