VENDIM PËR SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA NDËRTIMI I RRUGËS KARDHIQ-DELVINË

V E N D I M

PËR

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA NDËRTIMI I RRUGËS KARDHIQ-DELVINË

Në mbështetje të nenit 100 të Kushtetutës, të neneve 5, pika 1, 20 e 21, të ligjit nr.8561, datë 22.12.1999, “ Për shpronësimet dhe marrjen në përdorim të përkohshëm të pasurisë, pronë private, për interes publik”, dhe tё nenit 8, të           ligjit nr.9836, datë 26.11.2007, “Për buxhetin e shtetit, të vitit 2008”, tё ndryshuar, me propozimin e ministrit të Punëve Publike, Transportit dhe Telekomunikacionit, Këshilli i Ministrave                                  

V E N D O S I:

1.       Shpronësimin, për interes publik, të pronarëve të pasurive të paluajtshme, pronë private, që preken nga ndërtimi i rrugës Kardhiq-Delvinë.

2.       Shpronësimi tё bëhet në favor të Drejtorisё sё Pёrgjithshme tё Rrugёve.

3.       Pronarët e pasurive të paluajtshme, që shpronësohen, të kompensohen në vlerë të plotë, sipas masës përkatëse, që paraqitet në tabelёn, qё i bashkёlidhet kёtij vendimi, për objekte, me vlerë 2 005 032 (dy milionë e pesë mijë e tridhjetë e dy) lekë, për kultura bujqësore, me vlerë 836 359 (tetëqind e tridhjetë e gjashtë mijë e treqind e pesëdhjetë e nëntë) lekë.

4.       Shpenzimet procedurale, në shumën 647 500 (gjashtëqind e dyzet e shtatë mijë e pesëqind) lekë, të përballohen nga Drejtoria e Pёrgjithshme e Rrugёve.

5.       Vlera e përgjithshme e shpronësimit, 2 841 391 (dy milionë e tetëqind e dyzet e një mijë e treqind e nëntëdhjetë e një) lekë, të përballohet nga zëri “Shpronësime”, miratuar për Ministrinë e Punëve Publike, Transportit dhe Telekomunikacionit.

6.       Shpronësimi të fillojё më 30 dhjetor 2008 dhe tё përfundojë më  30 mars 2009.

7.       Drejtoria e Pёrgjithshme e Rrugёve tё bëjë likuidimin e pronarëve brenda afatit të parashikuar në pikën 6, të këtij vendimi.

8.       Ngarkohen Ministria e Punëve Publike, Transportit dhe Telekomunikacionit dhe Drejtoria e Pёrgjithshme e Rrugёve për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

SALI  BERISHA