VIDEO/ Protestuesit sjellin rrotull nëpër Tiranë forcat e policisë, të rinjtë marshojnë në kryeqytet të ndjekur nga efektivët

Një grup protestuesish, të shkëputur nga turma e mbledhur pranë Ministrisë së Brendshme, kanë marshuar në disa rrugë të Tiranës, duke sjellë rrotull qytetit edhe efektivët e Policisë.

Të rinjtë kanë vijuar lëvizjen përgjatë bulevardit “Zogu i Parë” dhe më pas në rrugën “Asim Vokshi”, duke i zhvendosur edhe forcat e policisë nga njëra zonë në tjetrën.

Siç shihet edhe nga pamjet, gjatë marshimit disa protestues u kanë vënë zjarrin koshave të mbeturinave, ndërsa kanë nxjerrë në rrugë edhe pjesë metalike të trafikndarëseve dhe sende të tjera.

Ndërkohë, efektivët, të pajisur me maska dhe pajisjet përkatëse, i kanë ndjekur të rinjtë përgjatë rrugëve kryesore dhe rrugicave të lagjeve, duke u zhvendosur bashkë me ta nëpër kryeqytet.