Vasili u shet 10 mijë lekë një formular patente qytetarëve të siguruar
Nëse të duhet të kryesh një kurs për dëshminë e automjetit atëherë përpos kohës së harxhuar duhet të kesh mbushur mirë edhe xhepin, pasi fillimisht vetëm formulari që duhet plotësuar me të dhënat personale por edhe me përgjigjet e
ekzaminimeve të kritereve, për të qenë i aftë për të marrë një kurs patente kushton 20 mijë lekë të vjetra. Ky çmim edhe pse rezulton të jetë në stratosferë, sërish ministria e shëndetësisë e cila është një nga organet shtetërore që është përgjegjës për qendrat shëndetësore që e lëshojnë këtë formular nuk jep asnjë sqarim se përse ky çmim është kaq i shtrenjtë. Ndërsa në qendrat shëndetësore në lagje aty ku formularët shiten si të jenë plaçka në pazar, ankesat janë të përditshme jo vetëm për çmimin stratosferik të vendosur nga ministria e shëndetësisë por edhe për angaritë e krijuara pa fund për kryerjen e ekzaminimeve. Formulari plotësohet më pas duke kryer të gjitha vizitat shëndetësore kryesore që kanë të bëjnë me aftësitë e duhura pa të cilat nuk mund të marrësh një dëshmi automjeti. Përsa i përket çmimit të vendosur nga ministria e shëndetësisë personat e pasiguruar të cilët duhet të tërheqin një formular për patentë i cili disponohet vetëm në qendrat shëndetësore në lagje, çmimi real i tij është 20 mijë lekë, të vjetra për personat e pasiguruar e për ata të cilët nuk disponojnë sigurime shëndetësore është në vleftën e 10 mijë lekëve të vjetra. Në lidhje me këtë çmim sipas vëzhgimit të kryer nga gazeta SOT ditën e djeshme në disa prej qendrave shëndetësore të lagjeve të ndryshme në kryeqytet, dhjetëra qytetarë ankoheshin se çmimi i formularit për kursin e patentës është stratosferik e përpos kësaj edhe vonesat e angaritë janë tepër të bezdisshme. Edhe pse në lidhje me këtë të gjitha ekzaminimet kryhen në urgjencat apo poliklinikat e lagjeve përkatëse të cilat kontrollohen nga ministria e shëndetësisë sërish ky institucion ia kalon përgjegjësinë si gjithmonë një institucioni tjetër. Në lidhje me këtë, ditën e djeshme burime nga ministria e shëndetësisë thanë për gazetën se vendosja e çmimit për formularët e patentave nuk ishin përgjegjësi e ministrisë por e një institucioni tjetër. Kështu ministri Vasili duket sikur do të fshehë të vërtetën që përditë e vuajnë qytetarët të cilët kryejnë ekzaminimet e paguajnë në mënyrë brutale një formular 20 mijë lekë. Gjithashtu ministri Vasili në lidhje me formularin e kursit të patentës, i ka kthyer qendrat shëndetësore e poliklinikat apo urgjencat e lagjeve çerdhe klienteliste ku ata që dëmtohen janë vetëm qytetarët.
Vonesat
Përpos çmimit të lartë vetëm të një formulari i cili më pas do të plotësohet me të dhënat nga ekzaminimet shëndetësore tek mjekët specialistë, neurologë, kardiologë, okulist apo mjeku i familjes në rast se do të nisësh një kurs patente duhet të përballesh në shumë raste edhe me angaritë që të sjellin mjekët e stafi i qendrave shëndetësore të cilët në shumicën e rasteve ti vonojnë përgjigjet, apo edhe në rastet më banale nuk japin raportet mjekësore pa marrë ryshfet nga qytetarët. Ndërsa nga ana tjetër ministria e shëndetësisë është indiferente e ditë pas dite rrit çmimet e ul shërbimin për qytetarët të cilët duhet të mendohen disa herë për tu përgatitur e për të filluar procedurat për të kryer një kurs patente. Në lidhje me këtë përpos çmimeve tepër të larta të ekzaminimeve shëndetësore qytetarëve u duhet të përballen edhe me shërbimet tepër të dobëta që ju ofrohen në qendrat shëndetësore ku për një ekzaminim duhet të shkosh në disa poliklinika apo qendra shëndetësore.
Arta AGOLLI