Vatra: Institucionet duhen respektuar dhe jo të rrethohen e të provokohen

Në një deklaratë për zgjedhjet në Shqipëri të bërë nga Federata Panshqiptare Vatra me qendër në Nju Jork, thuhet se rezultati i ngushtë vuri në provë institucionet shqiptare.
Institucionet duhen respektuar dhe jo të rrethohen e të provokohen, thotë Vatra. Respektimi i Kushtetutës dhe i procesit zgjedhor, thuhet në deklaratë, do ta zgjidhë situatën; çdo rrugë tjetër e paligjshme do të çojë në acarim dhe do të rrezikojë daljen e vendit jashtë kontrollit. Ashtu si pjesa më e madhe e shqiptarëve në emigracion, thotë Vatra, kemi mbetur të zhgënjyer nga klasa politike. Qytetarët e fituan betejën zgjedhore deri në mbylljen e votimeve, ndërsa më pas nisi zhgënjimi nga militantizmi partiak dhe acarimi i klimës zgjedhore, thuhet në deklaratën e organizatës Vatra, e cila u kërkon politikanëve t’i thërrasin arsyes dhe të ndalin anarkinë.

Deklaratë e Federatës Pan-Shqiptare në Amerikë “VATRA”
“Të dashur  bashkëkombës! Po ju drejtohemi në këto çaste të vështirë, që po kalon Shqipëria jonë e dashur, me lutjen, që të tregoheni të përmbajtur dhe të mendoni më shumë për interesat e Kombit se sa ato të partive politike. Vetë rezultati i ngushtë për zgjedhjen e kryetarit të Bashkisë së Tiranës tregon se gjysma e qytetarëve duan të qeverisen nga njëri kandidat e gjysma tjetër nga kandidati tjetër, dikton një vetëpërmbajtje me ndërgjegje të lartë kombëtare,  dhe ndjekjen e rrugës ligjore për zgjidhjen e problemit. Ky rezultat i ngushtë vuri në provë institucionet shqiptare, të cilat duhen respektuar dhe jo të rrethohen e të provokohen. Respektimi i Kushtetutës dhe i procesit zgjedhor do ta zgjidhë situatën; çdo rrugë tjetër e paligjshme do të çojë në acarim dhe do të rrezikojë daljen e vendit jashtë kontrollit. Federata Vatra i ka ndjekur këto zgjedhje me vëmendje të veçantë, duke shpresuar se demokracia do ta fitonte këtë betejë. Por fatkeqësisht, vatranët, ashtu si pjesa më e madhe e shqiptarëve në emigracion, mbetën të zhgënjyer nga klasa politike, e cila vazhdon të qëndrojë një hap mbrapa qytetarëve, të cilët e fituan betejën zgjedhore deri në mbylljen e votimeve, ndërsa më pas nisi zhgënjimi nga militantizmi partiak dhe acarimi i pas klimës zgjedhore. Tabloja mjerane që sillnin ekranet edhe këndej Atlantikut, ku deputetët zvarriteshin nëpër mure e hekurat e rrethimeve të vendnumërimeve të votave, kërcimi mbi shpinat e kokat e policëve, akuzat e ndërsjella, sharjet, kërcënimet, krijoi tensionin, zgjati procesin dhe paragjykoi rezultatin.
Vatrën e shqetësojnë tensioni dhe dhuna e këtyre ditëve nëpër Shqipëri, duke
paralajmëruar një ’97-të të dytë, ç’ka do të ishte fatale për Shqipërinë. Bllokimi i rrugëve Kombëtare, po na kthen 20 vite mbrapa, ndërkohë që  synohet integrimi Europian. Me keqardhje konstatojmë se, me veprimet e veta me ngarkesa të thella partiake, me dyshimin e madh tek pala kundërshtare, me retorikat agresive emocionale, me thirrje për kryengritje, klasa politike po e hedh vendin në kaos. Politikanë, kujdes se nesër do t’ju gjykojë  historia për dëmin e  madh që po i shkaktoni, jo vetëm Shqipërisë, por të gjithë Kombit shqiptar. Ju lutemi, ndaleni zemërimin e qytetarëve, mos e ushqeni më tutje militantizmin e turmave sepse Shqipëria është më e shtrenjtë se partitë. Cilës parti i duhet një Shqipëri në anarki, një Shqipëri e rrënuar dhe në kaos? Një Shqipëri e tillë do
t’u duhej vetëm armiqve të kombit tanë. Mosardhja e zotit Barroso në Shqipëri tregon se klasa politike e humbi një rast të artë për të marrë një ftesë si vend kandidat për Bashkimin Europian. Ajo që ikën nuk kthehet më pas, por në këto kushte rëndësi ka mosthellimi i krizës, pasojat e së cilës bien mbi qytetarët. Klasa politike në këto 20 vite tranzicion të pakuptimtë, nuk ka qenë në gjendje që të zgjidhë asnjë situatë të vështirë, pa arbitrimin e të huajve. Edhe në këto zgjidhje ambasadorët u përpoqën që të ishin arbitra, por sërish problemi ka mbetur pezull. Mendojmë se kjo situate e gjen zgjidhjen duke iu referuar ligjeve, institucioneve, pavarësisht dobësisë së tyre, si dhe respektimit të
shtetit ligjor. Politikanë që keni në dorë fatet e atdheut tonë, ju lutemi thirrni arsyes dhe
ndalni anarkinë. Shqipëria ka nevojë për demokraci, jo për anarki.
Shpëtojeni Shqipërinë se është në duart tuaja!”.