Vidhet argjendaria, policia në kërkim të autorëve

Vidhet argjendaria, hajdutët ikin të mbushur me flori nëpër natë. Një nga argjendaritë në qendër të qytetit bregdetar të Durrësit, përballë ish-dyqanit të luleve, është vjedhur me thyerje gjatë orëve të para të së shtunës, kur të gjithë, përfshirë dhe forcat e policisë, ishin përqendruar në situatën që po krijohej në periferitë e qytetit për shkak të reshjeve të dendura të shiut. Burime nga grupi hetimor që vazhdon punën në vendin e ngjarjes bëjnë të ditur se hajdutët kanë marrë sasi të shumta malli, kryesisht bizhuteri të florinjta, të cilat paraprakisht mendohet se kapin vlerën e 1.1 milionë lekëve. Policia ka nisur punën për të zbuluar autorët e vjedhjes dhe kapur ata, ndërsa materialet paraprake për veprën penale të vjedhjes me thyerje i kanë kaluar për hetime të mëtejshme Prokurorisë së Rrethit Gjyqësor Durrës.

Va.Qy.