Vidhte për të mbajtur familjen, se nuk gjente punë

Shtëpia ku jetonte Bushi së bashku me të shoqen dhe të bijën është në qendër të qytetit, ngjitur me xhaminë e madhe dhe amfiteatrin antik. Ai ishte i pastrehë dhe burri i motrës i kishte lënë në përdorim shtëpinë me një dhomë e një kuzhinë. Askund nuk gjente punë. Ishte regjistruar prej kohësh, sipas së motrës, në Zyrën e Punës në Durrës, por asnjëherë nuk i patën ofruar një vend pune, qoftë edhe të përkohshme: "I thoshin se dhe për kamerier duhej të dinte një gjuhë të huaj". Edhe në Bashkinë e Durrësit ia kishin përplasur derën në fytyrë, duke mos e futur në skemën e ndihmës sociale. "Nuk i dhanë as 40 mijë lekë të vjetra që të mbanin frymën", thotë me dëshpërim e motra, duke shtuar se edhe nëse bëri ndonjë të keqe (vjedhje) e bënte nga halli, i detyruar për të mbajtur familjen në kushtet e pamundësisë për të gjetur punë.