Vijojnë reshjet e dëborës, mijëra banorë ende të izoluar

Mijëra banorë në veri dhe verilindje të vendit vazhdojnë të jenë të bllokuar nga dëbora. Reshjet e dendura të dëborës që vijojnë të bien që prej dy ditësh kanë përkeqësuar edhe më tej situatën në veri të vendit, ku trashësia e dëborës ka arritur mbi 3 metra.
 

Në qarkun e Kukësit të gjitha akset rurale dhe shumë komuna vijojnë të mbeten të bllokuara nga dëbora ndërsa në akset nacionale qarkullimi i automjeteve bëhet vetëm me zinxhirë. Sipas informacioneve aksi rrugor Kukës-Krumë dhe Morinë-Kalimash janë të kalueshme me zinxhirë.
 

Në qarkun e Dibrës kanë rënë reshje dëbore gjatë gjithë natës, situata vijon të jetë e rënduar ku të gjitha komunat janë të bllokuara nga dëbora. Mësohet po punohet për mirëmbajtjen e rrugës nacionale Peshkopi-Qafë Buall. Mbrëmë në Fushë Bulqizë u shemb çatia e një banese ku mbetën të pastrehë 4 familjarë.
 

Problematike paraqitet situata edhe në aksin rrugor Tiranë-Elbasan, ku në Qafë Krrabë kalohet vetëm me zinxhirë për shkak të dëborës. Mësohet se reshjet e dëborës kanë shkaktuar vështirësi edhe në lëvizjen e mjeteve brenda në qytetin e Elbasanit. Mësohet se kalohen me zinxhirë Aksi Librazhd-Pogradec, në Qafë Thanë dhe aksi Korçë-Pogradec. Gjithashtu në qarkun e Korçës vijon të jetë e bllokuar prej disa ditësh rruga drejt zonës së Dardhës ndërsa aksi rrugor Korçë-Voskopojë dhe Qafa e Qarrit në aksin Korçë-Ersekë kalohen vetëm me zinxhirë.  Raportohet se reshje dëbore kanë rënë edhe në shumë zona të ulta të vendit si në Lushnje dhe Fier por edhe në kryeqytet.