Viti i ri shkollor, policia e Tiranës merr masa

Me rastin e nisjes së vitit të ri shkollor, policia e Tiranës ka marrë një sërë masash për forcimin e rendit dhe sigurisë publike pranë qëndrave studentore dhe shkollat e të gjitha niveleve.

Këto masa konsistojnë në organizimin dhe drejtimin e shërbimeve të policisë në kontrollin e plotë të territorit, në përcaktimin dhe ndjekjen e detyrave nga Patrulla e Përgjithshme të Policisë, strukturat e Parandalimit dhe Hetimit të Krimeve, në interes të garantimit të rendit e qetësisë publike dhe zhvillimit normal të proçesit mësimor, në shkollat e të gjitha niveleve në Qarkun e Tiranës.
 

Kështu, në ditën e parë të shkollës dhe në vazhdim, Policia e Tiranës, do të angazhojë pranë objekteve shkollore punonjës policie të cilët do të garantojnë rendin dhe sigurinë publike në shkolla.

Gjithashtu forcat e policisë do të ndihmojnë për lëvizjen e lirë të mjeteve dhe të këmbësorëve në afërsi të shkollave, si dhe do të marrin masat e nevojshme ligjore ndaj kundravajtësve ku vëmendje në këtë drejtim do të përqëndrohet ndaj drejtuesve të mjeteve që ecin me shpejtësi apo parkojnë në vende të ndaluara në afërsi të shkollave.