Vlorë, të shtëna arme në mes të qytetit

Një breshëri të shtënash është dëgjuar në mes të qytetit të Vlorës para pak minutash. Ngjarja ka ndodhur përballë poliklinikës qendrore, ku një i ri i paidentifikuar ka qëlluar me pistoletë në drejtim të një personi tjetër.

Sipas dëshmitarëve në vendngjarje, një person i veshur me rroba ngjyrë blu ka qëlluar dy herë në drejtim të një tjetri. Ky i fundit është larguar duke u futur në mes të pallateve, ndërsa agresori e ka ndjekur duke qëlluar në drejtim të tij edhe dy herë të tjera.

Fatmirësisht nga të shtënat nuk është lënduar asnjeri. Zona ku ka ndodhur ngjarja është një zonë mjaft e populluar sidomos në orët e paradites. Burime për shekullin bëjnë të ditur se është shoqëruar në polici personi i sulmuar, dëshmia e të cilit pritet të hedhë dritë mbi ngjarjen. / Anila Peçi