Votohet për masat e reformave

Dhoma e Ulët e Parlamentit italian do të votojë sot për masat e reformave që ka kërkuar Bashkimi Evropian, të cilat janë miratuar në Senat. Nëse masat e reja të kursimit do të aprovohen, atëherë hapet rruga që kryeministri Silvio Berluskoni gjatë këtij vikendi të japë dorëheqje dhe të formohet qeveria e re.

Senati italian të premten me 156 vota ‘për’ dhe 12 ‘kundër’ miratoi ligjin buxhetor, i cili përmban masa reformatore, synimi i të cilave është që të nxjerrin vendin nga kriza ekonomike, e cila pritet të kërcënojë gjithë eurozonën.

Berluskoni ka paralajmëruar se do të japë dorëheqje menjëherë pasi të dyja dhomat e parlamentit të miratojnë reformat.

Besohet se në krye të qeverisë kalimtare mund të vendoset ekonomisti Mario Monti, të cilin presidenti Xhorxho Napolitano para tri ditësh e ka emëruar si senator të përjetshëm.

Plani i reformave nënkupton zvogëlimin e shpenzimeve publike, rritjen e tatimeve, ngrirjen e pagave në sektorin publik deri në vitin 2014, shtrenjtimin e karburanteve dhe shitjen e pasurisë shtetërore.

Ndër masat e parapara është edhe ngritja graduale e kufirit për shkuarje në pension të të punësuarve në sektorin privat, nga 60 vjet në 65, në vitin 2026.

Kreu i FMN-së, Kristin Lagard ka përshëndetur “progresin e dukshëm”, të cilin Italia dhe Greqia e kanë arritur në luftën kundër krizës politike.

“Ajo çka ne dëshirojmë është stabiliteti politik dhe politika e qartë në të dyja vendet. Besoj se është arritur përparim i dukshëm”, ka thënë Lagard gjatë vizitës në Tokio.