Vrasja e “Takut”, pyeten dy dëshmitare

TIRANE – Dy dëshmitare janë marrë në pyetje nga grupi hetimor i policisë dhe prokurorisë, në lidhje me vrasjen e 35-vjeçarit Spartak Camaj, i cili u ekzekutua me armë zjarri një javë më parë në Tiranë. Njëra prej këtyre dëshmitareve, sipas policisë, dyshohet se ka qenë bashkë me 35-vjeçarin në makinën e tij tip “Fiat Punto”, në momentin kur Spartak Camaj është qëlluar me armë zjarri pranë rrugës “Vasil Shanto”. Ndërkohë dëshmitarja tjetër, sipas të dhënave nga hetimi i çështjes, rezulton e njohur e viktimës dhe person që ka pasur kontakte të shpeshta me 35-vjeçarin. Zbardhja e emrave të dy dëshmitareve është bërë pas verifikimit të tabulateve të thirrjeve telefonike, ku është bërë edhe një listim i personave me të cilët Spartak Camaj kishte kontaktuar natën e vrasjes. Sipas policisë, njëra nga dëshmitaret kishte kontaktuar me viktimën rreth një orë para vrasjes dhe besohet se ka qenë bashkë me Spartak Camajn, i njohur si “Taku i Yberishtit”, në makinë kur ai u qëllua me armë zjarri. Dëshmitarja, sipas burimeve hetimore, mësohet të ketë thënë se nuk ka arritur të shohë personin që ka qëlluar mbi 35-vjeçarin. Prokuroria dhe policia e Tiranës janë duke hetuar në tri pista për vrasjen e Spartak Camajt. Një prej këtyre pistave lidhet me konflikte për pronat e viktimës në Yzberisht, ku kohët e fundit po ndërtoheshin disa pallate të cilat ishin kundërshtuar nga 35-vjeçari. Ai kishte kërkuar përqindje për këto objekte nga investitorët, duke kërcënuar se përndryshe nuk do të lejonte ngritjen e pallateve. Pista e dytë lidhet me një hakmarrje për krimet ku ishte implikuar “Taku” i Yzberishtit, disa plagosje me armë të ndodhura në Tiranë në vitet 1991 dhe 1996. Pista e tretë lidhet me një konflikt të ndodhur pak ditë para vrasjes, siç dyshon policia, për njërën nga dëshmitaret që janë marrë në pyetje së fundi.