Vritet i afermi i Bollanos
HIMARË - “Krishti u ngjall, Krishti u ngjall!!!”. Me këtë shprehje e mbylli dje krimin e tij një 24-vjeçar, i cilësuar monstër, që masakroi një të moshuar, të cilit fillimisht i çau kafkën, i nxori prej andej trurin e më pas i hapi barkun me një thikë, duke i nxjerrë jashtë organet e brendshme. Qyteza e Himarës u trondit dje nga një ngjarje tejet e pazakontë, teksa 72-vjeçari Pirro Bollano, një i afërm i largët i kryetarit të bashkisë Vasil Bollano, gjeti vdekjen në mënyrë makabre. E kishte punësuar si punëtor me mëditje, pa e ditur se konfliktet për pagesën “do t’i hanin kokën”. Gjithçka ndodhi pas një konflikti për motive të dobëta me 24-vjeçarin nga fshati Fiershegan i Lushnjës, Bledi Xhaferi, i cili punonte me mëditje si punëtor krahu në Himarë.
Ngjarja
Vrasja në Himarë u shënua paraditen e djeshme, teksa punëtori i krahut, Xhaferi, nisi të debatojë me të moshuarin Bollano, për çështjen e pagesës. Pasi nuk mundën të bien dakord për lekët, 24-vjeçari rrëmbeu nga toka gurë e sende të forta, me të cilat nisi të godasë kudo, në kokë, trup e fytyrë 72-vjeçarin, i cili u rrëzua menjëherë në tokë, për shkak të plagëve. Mësohet se i moshuari gjeti vdekjen nga hemorragjia e madhe nga plagët që i shkaktoi i riu, që njihej në Himarë si person me probleme të theksuara mendore. “E goditi pa mëshirë me gur në kokë, ndërsa nga koka e Pirros i cili ra përtokë, nisi të rrjedhë gjaku rrëke”, - tregojnë të rrënqethur dëshmitarët.
Ngjarja ndodhi në qendër të Himarës, përballë godinës së Albtelekomit, ndërsa shumë të pranishëm e panë gjithë skenën. Sipas dëshmitarëve okularë, pasi e rrëzoi në tokë nga goditjet, i riu vijoi edhe më, derisa i çau kafkën. “Më pas, si në ekstazë, ai futi gishtat në kafkën e thyer të plakut, duke i nxjerrë trurin”, thanë për gazetën banorët që asistuan në ngjarjen e pazakontë. Pasi përfundoi me kokën e 72-vjeçarit, i cilësuari monstër nxori nga xhepi një thikë, me të cilën i përshkoi barkun tejpërtej viktimës, duke i çarë të gjithë organet e brendshme. Pas kësaj, ai u gjunjëzua përpara viktimës dhe nisi të bërtasë “Krishti u ngjall”. Banorët, tejet të frikësuar, u futën në dyqane a shtëpi, ndërsa një efektiv i policisë së Himarës mundi t’i afrohet 24-vjeçarit të gjunjëzuar përpara viktimës dhe e neutralizoi. Policia lokale prangosi Bledi Xhaferin, të cilin e shoqëruan fillimisht në postën e policisë së Himarës, e më pas drejt paraburgimit të Komisariatit të Vlorës. Uniformat blu konfirmuan se vrasësi ka probleme mendore, por gjithsesi hetimet kanë nisur dhe ai do të analizohet nga specialistët përkatës.