Xhaçka: Kriza, koha për protesta kundër qeverisë

24/03/2010 “Për të gjitha këto arsye dhe për atë mori problemesh që ne të gjithë i përjetojmë në jetën tonë të përditshme, u bëjmë thirrje shqiptarëve që të na bashkohen në një valë të pandalshme protestash kundër kësaj qeverie, e cila sot më pak se kurrë ka legjitimitetin për të na qeverisur”, - kjo ka qenë thirrja e radhës e Partisë Socialiste drejtuar opinionit publik. Deputetja e kësaj partie Olta Xhaçka, duke u ndalur në situatën e rënduar ekonomike, shigjetoi ashpër qeverisjen aktuale. “Sali Berisha na flet për mirëqenie e për politika sociale, por sot shqiptarëve u duhet të përballen me një rritje të çmimit të energjisë, që i merr çdo familjeje mesatare shqiptare 30 për qind të të ardhurave të tyre të pakta. Prandaj sot është koha që t’i bashkoheni protestës sonë kundër kësaj qeverie”, - vlerësoi ajo. Madje, po në këtë linjë, Xhaçka shtoi se “mashtrimet dhe papërgjegjshmëria e qeverisë vijnë si pasojë e deformimit të vullnetit të shqiptarëve më 28 qershor, pasi një qeveri që nuk varet nga votat e qytetarëve për pushtetin e saj nuk ka si t’u përgjigjet nevojave, interesave, shqetësimeve dhe aspiratave të tyre. Prandaj më shumë se kurrë sot është koha për të protestuar kundër kësaj qeverie”.