“Xhaxhi”, “hapadollapa” me Vllazninë e Tiranën

Një gol i anuluar i Migen Memellit të Tiranës në minutën e fundit të takimit, si dhe nga një shtyllë e dy Xhafave, Fjodorit të Elbasanit në minutën e 7-të dhe një tjetër i Danielit të Tiranës në të 25’, përbënin edhe momentet kulmore të supersfidës Tirana-Elbasani (0-0), e vlefshme për javën e 21-të të Kategorisë Superiore.
Verdheblutë të drejtuar nga “veterani” i bankinave, Faruk Sejdini, ashtu siç rrëzuan një javë më parë Vllazninë nga vendi i parë, pas barazimit pa gola në “Ruzhdi Bizhuta”, ndëshkuan një tjetër skuadër të vendit të parë të këtij sezoni, Tiranën, falë një tjetër barazimi të bardhë.
Tirana tani është në pritje të ndeshjes së të dielës në “Loro Boriçi”, Vllaznia-Lushnja, për të mësuar nëse do të jetë ajo “kampionia simbolike e fazës së dytë” apo Vllaznia, “kampionia simbolike e dimrit”.
Nëse shkodranët e drejtuar nga Agim Canaj do të fitojnë me Lushnjën e Ilir Gjylës, atëherë do të luhet në Shkodër edhe java e fundit e kampionatit (e 33-ta), për të pasur ndoshta një tjetër “finale” dramatike midis dy skuadrave më të mira të momentit, ashtu si sezonin e kaluar e përjetuan Dinamo e Partizani.
Kronika e takimit është e pasur për të dyja skuadrat, por që nis nga miqtë. Në minutën e 7-të, sulmuesi i Elbasanit, Fjodor Xhafa, brenda zonës, me një goditje “gërshërë”, përplasi topin në shtyllën e majtë pingule të portës së mbrojtur nga 37-vjeçari i Tiranës, Blendi Nallbani, duke dhënë sinjalin e parë të një ndeshjeje të “nxehtë”.
Në të 20’, Elbasani kërkoi penallti, por gjyqtari Latifi dha goditje të lirë për Tiranën për faull ndaj mbrojtësit Andi Lila. Në 25 minutat e para verdheblutë e Faruk Sejdinit ushtruan presing ndaj kundërshtarëve të tyre, duke zotëruar mesfushën e duke ndërmarrë kundërsulme të shpeshta.
Në minutën e 25-të Muzaka ndërmori një aksion nga e djathta për Tiranën, harkoi në zonë dhe aty Daniel Xhafaj, me një kërcim të fuqishëm, goditi me kokë traun horizontal të portës së mbrojtur nga Osmani. Në minutën e 31-të, Memelli zëvendësoi Abrahamin e dëmtuar, duke formuar dyshen e sulmit me Xhafajn, të mbështetur nga Muzaka, Devolli e Patushi. Në minutën e 41-të, Agolli ekzekutoi një goditje të lirë nga 18 metra, duke rrezikuar seriozisht portën elbasanase pas rrëmujës së krijuar në zonën verdheblu.
Pjesa e dytë nisi me një goditje të bukur me kokë me anë të golashënuesit më të mirë të kampionatit, Migen Memelli (47’), pas harkimit perfekt nga Gjergji Muzaka, por reagimi i Osmanit ishte i jashtëzakonshëm dhe që mbyllet po nga goditja me kokë e Memellit, që mposht më në fund portierin Alfred Osmani, por goli i sulmuesit të 23 herë kampionëve ishte në pozicion jashtë loje.
Tirana, që humbi edhe në fazën e parë kundër Elbasanit (1-0, gol i ish-it Oriand Abazaj), do të udhëtojë në javën e fundit në Lushnjë në një sfidë shumë përcaktuese për vendin e parë. Ky ishte barazimi i 36-të në 133 ndeshje midis dy skuadrave.

Kategoria Superiore
Java 21

E shtunë, 21.02.2009, 14:30

Tirana-Elbasani 0-0
Gjyqtar: Tanush Latifi (Gjirokastër)
Faza I: Elbasani-Tirana 1-0
Shënues: Abazaj

Partizani-Besa 1-0
Shënues: Ngjela 45’+1
Gjyqtar: Mentor Sopjani (Durrës)
Faza I: Besa-Partizani 0-0

E diel, 22.02.2009

Vllaznia-Lushnja
Gjyqtar: Remzi Sadiku (Elbasan)
Faza I: Lushnja-Vllaznia 1-4
Shënues: Çela/ Beqiri, Bashiç, Dhembi, Lici (p)

Flamurtari-Dinamo (14:00)
Gjyqtar: Lorenc Jemini (Tiranë)
Faza I: Dinamo-Flamurtari 1-1
Shënues: Plaku / Brajkoviç

Apolonia-Shkumbini
Gjyqtar: Kridens Meta (Tiranë)
Faza I: Shkumbini-Apolonia 2-0
Shënues: Rizvanolli, Deliovski

Bylis-Teuta
Gjyqtar: Sokol Jareci (Tiranë)
Faza I: Teuta-Bylis 1-0
Shënues: Vila (p)

RENDITJA
KATEGORIA SUPERIORE, RENDITJA PAS JAVES 21
P GSH GP
1 Tirana* 40 34 17
2 Vllaznia 38 29 16
3 Dinamo 32 25 18
4 Shkumbini 30 21 19
5 Besa* 29 20 23
6 Teuta 26 15 14
7 Flamurtari 25 15 16
8 Elbasani* 25 16 17
9 Apolonia 24 22 28
10 Partizani* 22 15 21
11 Lushnja 18 14 24
12 Bylis 18 15 28
* Një ndeshje me shumë

22 Shkurt 2009