Xhelozia, ekzekutohet me tri plumba brenda në spital mjeku Fatmir ThaçiNga TemaMjeku Fatmir Thaçi është ekzekutuar paraditen e djeshme brenda ambienteve të spitalit të Durrësit. Shefi i repartit të Radiologjisë është qëlluar me tri plumba në kokë nga

Nëse dëshironi të lexoni edicionin online të gazetës në PDF klikoni këtu.

Mjeku Fatmir Thaçi është ekzekutuar paraditen e djeshme brenda ambienteve të spitalit të Durrësit. Shefi i repartit të Radiologjisë është qëlluar me tri plumba në kokë nga ana e Ali Lohjas, i cili më pas është vetëdorëzuar në polici. Motivi i kësaj ngjarjeje të rëndë mendohet që të ketë qenë xhelozia e Lohjas, i cili ka deklaruar se dyshonte se mjeku Thaçi kishte një lidhje me ish-gruan e tij, e cila në fakt nuk jeton më, pasi është vetë-helmuar rreth dy muaj më parë. Ky fakt është pohuar edhe nga vetë autori, gjatë marrjes në pyetje nga ana e oficerëve të policisë.

Krimi

Mëngjesin e djeshëm, mjeku radiolog, Fatmir Thaçi, 52 vjeç, është drejtuar si zakonisht drejt spitalit të Durrësit, ku dhe punon prej vitesh. Rreth orës 09:00, në sallën e tij, ku ka qenë duke plotësuar disa formularë, ka trokitur 46-vjeçari Ali Lohja. Sipas punonjësve të spitalit, të cilët kanë qenë vetëm pak metra larg sallës së mjekut Thaçi, Lohja ka parë në sy mjekun dhe i është drejtuar me fjalët: “Si i le jetimë fëmijët e mi, ashtu le të ngelen edhe të tutë”. Pas këtyre fjalëve, gjatë të cilave Thaçi ka mbetur i shtangur, Ali Lohja ka nxjerrë nga brezi një pistoletë dhe ka qëlluar me gjakftohtësi tri herë në kokë mjekun radiolog. Ky i fundit ka gjetur vdekjen e menjëhershme, ndërsa autori i krimit ka hedhur armën përdhe dhe ka pritur oficerët e policisë. Spitali i Durrësit është terrorizuar nga të shtënat, teksa për minuta të tëra, derisa mbërritën forcat e policisë, mbizotëronte kaosi dhe frika totale. Në vendin e ngjarjes kanë shkuar punonjësit e policisë, të cilët kanë vënë në pranga autorin e ngjarjes së rëndë, i cili nuk ka bërë as më të voglin veprim për të kundërshtuar. Nga hetimet paraprake dhe sipas dëshmive të punonjësve të spitalit, ngjarja e rëndë mendohet që të ketë pasur si motiv xhelozinë e Ali Lohjas. Ky i fundit mësohet se ka thënë në polici që mjeku Thaçi i shkatërroi familjen dhe për këtë arsye ai vendosi që të hakmerret duke e vrarë. Ali Lohja ishte xheloz ndaj së shoqes dhe për këtë arsye ushtronte dhunë ndaj saj. Kjo e fundit, duke mos duruar dot më dhunën e vazhdueshme, i ka dhënë fund jetës. Pas kësaj Ali Lohja duket se ka bërë përgjegjës për këtë ngjarje pikërisht mjekun Fatmir Thaçi dhe nuk ka gjetur qetësi, deri ditën e djeshme, kur ka vrarë në mënyrë makabre mjekun radiolog. Tashmë ai do të procedohet penalisht për veprën e “Vrasjes me dashje”, vepër për të cilën duket se do të marrë dënimin maksimal. Ky nuk është rasti i parë kur mjekët bien pre e dhunës dhe sulmohen brenda ambienteve të tyre të punës, teksa vetëm brenda një viti janë sulmuar mbi pesë mjekë.