Yunus garanton mbështetje në përpjekjet për zhdukjen e varfërisë në Shqipëri

Kryeministri Berisha pret nobelistin për paqen Prof. Muhammad Yunus
 
Kryeministri Berisha priti dje, nobelistin për paqen Prof. Muhammad Yunus, i cili ndodhet në Shqipëri për të promovuar iniciativën e qeverisë shqiptare për lëvizjen gjithëpërfshirëse për implementimin e konceptit të biznesit social në vend.
Yunus përgëzoi Kryeministrin Berisha për mbështetjen e tij ndaj Agjencisë për Nxitjen e Biznesit Social dhe Lëvizjes për Implementimin e Biznesit Social.
Kryeministri Berisha, duke e falënderuar Yunus për mbështetjen e kontributin e tij, shprehu bindjen se implementimi i biznesit social në partneritet me Yunus “Social Businnes Albania”, me kompani tregtare dhe institucionet akademike do të mund të adresojë problematikën e varfërisë, papunësisë e çështjeje të tjera sociale. Iniciativa të biznesit social, u shpreh Kryeministri, po ndërmerren duke adresuar problematika të arsimit profesional, të grumbullimit të produkteve bujqësore apo të punësimit të grave në punë artizanale. Kryeministri Berisha shprehu bindjen se këto janë vetëm shembujt e parë dhe të tjerë do të pasohen në sektorët e energjisë, arsimit, turizmit, shëndetësisë.
Yunus garantoi për mbështetjen e vazhdueshme që Yunus Social Businnes do të sigurojë në përpjekje për zhdukjen e varfërisë dhe adresimin e problemeve sociale në Shqipëri.