Zgjedhjet lokale, Kuçi takon ambasadorin e OSBE-së

Prishtinë - Zëvendëskryeministri Hajredin Kuçi ka falënderuar z. Almhofer për punën dhe angazhimin që po bënë Misioni i OSBE-së në Kosovë. Gjatë takimit është diskutuar për veprimet konkrete që duhet bërë për një përmirësim të gjendjes në të gjitha fushat që ka kompetencë OSBE-ja, por janë prioritete edhe të Qeverisë, si për rendin dhe ligjin, për të drejtat e minoriteteve si dhe të drejtat e njeriut, por edhe aspektet të tjera që kanë të bëjnë edhe me lirinë e shtypit, medieve, si dhe shumë aspekte që kanë të bëjnë me një demokratizim të tërësishëm të shoqërisë sonë.

“Në veçanti diskutuam edhe për çështjen e organizimit të zgjedhjeve lokale këtë vit. Qeveria e Kosovës fton OSBE-në që të punojmë bashkërisht, që të jemi në bashkëpunim të plotë dhe të kemi një ndihmë në organizimin sa më të mirë të zgjedhjeve lokale në këtë vit”, ka thënë zëvendëskryeministri i Qeverisë së Republikës së Kosovës, Hajredin Kuçi.

Kuçi shprehu bindjen se zgjedhjet do të jenë të lira dhe demokratike. OSBE-ja do ta luajë rolin e vet, së bashku me mekanizmat e tjerë ndërkombëtarë që do të jenë në Kosovë, por edhe ato që do të ftohen enkas për atë proces zgjedhor.

Ndërkaq ambasadori Almhofer, ka thënë se OSBE-ja do të vazhdojë ta luajë rolin e saj në zhvillimet në Kosovë, përfshirë këtu edhe zhvillimin e debateve publike nëpër media, e gjithashtu edhe përkrahjen e lirisë së mediave.

Almhofer ka theksuar se për zgjedhje është e domosdoshme liria e shprehje dhe është një ndër elementet kryesore për një shoqëri demokratike.