Zhbllokohet Vermoshi, 10 dite i izoluar

Shkoder- Ngritja e temperaturave dhe permiresimi i kushteve atmosferike, ka rikthyer normalitetin ne zonen veriore te vendit. Qarqet Shkoder dhe Kukes dje, jane zhbllokuar pas nderhyrjes se mjeteve borepastruese. Problematike ka qene situata ne skajin verior te Vermoshit, ku dje u deklarua zhbllokimi i rrugeve kryesore. Dhenia e nje fondi emergjent nga Keshilli i Qarkut, ka bere te mundur qe te punohet per zhbllokimin e aksit rrugor Selce-Vermosh, ku debora kishte izoluar 2 mije banore. Fondi i emergjences prej 500 mije lekesh ka bere te mundur qe pas 10 ditesh izolimi te plote, ky aks rrugor te behet i kalueshem. Sipas drejtorit te Ndermarrjes se Rrugeve Rurale ne Shkoder, Gjovalin Kodra, rreth 30 km segment rural ishin te bllokuar dhe trashesia e debores ne disa vende shkonte mbi 2 metra. "Per tri dite eshte zhbllokuar aksi Qafe e Perdolecit-Vermosh, ku debora dhe ngrica jane te medha", tha Kodra. Nike Gega, banor i zones, shprehet se tashme eshte e mundur te kalohet, ndonese ka ngrice akoma dhe rruga eshte e demtuar edhe kur nuk ka debore. Ai shton se 10 dite izolimi total, kane qene teper te renda per rreth 2 mije banore, nderkohe qe ka dhe mungese te madhe medikamentesh mjekesore. Vermoshi bllokohet disa here ne vit nga debora, por atje prej gati dy vjetesh mungon mjeku, ndersa aktualisht nuk ka as infermier. "Mjeku i vetem i Kelmendit qe punon ne Tamare, vjen dy here ne muaj ne Vermosh dhe nuk largohet pa mbaruar gjithe vizitat, por zona jone mbetet e izoluar gjate dhe nuk ka cfare te na beje nje mjek qe vjen nga Tamara", shprehen banoret.

R.Llazari