Zija Karini, 85 vite jetë dhe dekada përkushtim ndaj artit të drurit

Zija Karini, një nga mështrit e përpunimit të drurit, vijon të ushtrojë zanatin e trashëguar edhe sot në moshën 85-vjeçare. Artizani shkodran mbetet një shembull i rrallë i pasionit dhe përkushtimit ndaj zanatit.

Zija Karini është një nga mjeshtrit më të njohur të përpunimit të drurit në Shkodër. Artizani 85-vjeçar rrjedh nga një trung familjar që qysh në vitet 1920 zotëronte një ndërmarrje të njohur zdrukthtarie, ku punonin rreth 40 punëtorë, mes tyre edhe katër mjeshtër italianë.

Këtë trashëgimi, Zija Karini e ka ruajtur dhe zhvilluar për më shumë se 70 vite, duke ushtruar zanatin çdo ditë rreth gjashtë orë në punishten që zotëron.

Punimet e tij dallohen për mjeshtri të lartë, shije artistike dhe kreativitet, duke ruajtur individualitetin e një arti që sot po rrezikon të humbasë.

Në të shkuarën, Karini është përpjekur t’ua përcjellë zanatin brezave të rinj, por interesi i tyre ka qenë i ulët, duke e bërë edhe më të vështirë ruajtjen e kësaj trashëgimie të çmuar kulturore.

Zija Karini mbetet një shembull i pasionit, përkushtimit dhe vlerave të artizanatit shkodran, që vijon të jetojë falë mjeshtrave që nuk e braktisin atë, edhe pas dekadash pune.

/rtsh/