Zjarr në një apartament, dëme të shumta materiale

Një apartament është përfshirë nga flakët në një pallat pranë Ministrisë së Drejtësisë, në kryeqytet. Zjarri ka rënë në katin e gjashtë të ndërtesës, ndërkohë që policia dhe zjarrfikësit kanë evakuuar banorët e pallatit. Në momentin e rënies së flakëve nuk ka pasur asnjë person në apartament. Nga burimet policore mësohet se njoftimi është dhënë në orët e pasdites dhe se menjëherë janë marrë masat për shuarjen e flakëve, duke shmangur edhe lëndimin e ndonjë banori. Megjithatë, nga kjo situatë janë shkaktuar dëme të shumta materiale, sidomos në banesën ku ra zjarri dhe në ato që e rrethojnë. Policia do të nisë hetimet për të zbardhur ngjarjen, ndërkohë që mendohet se shkak për zjarrin mund të jetë bërë ndonjë pakujdesi, që ka sjellë edhe shkëndijën elektrike.